Manipur-a beihpui thlakah hel mi 13 man

Manipur-a beihpui thlakah hel mi 13 man
Pathianni khan police chuan a hma darkar 24 liam ta chhunga venhim hna thawktu hrang hrangten an state-a beihpui an thlaknaah hel 13 vel an man tih an sawi.
An mi mante hi dan pawna dah hel pawla ‘la tel mek’ an nih thu leh mi pawisa chhuhnaa inhnamhnawih an nih thu police hotu lianin a sawi a. “Mi thil chhuhsak leh dan lova chetna thleng kan dawng a, heng ralthuam keng leh helho dang tur hian khauh taka chet a ngai a ni,” a ti.
Police chuan Kangleipak Communist Party – People’s War Group [KCP (PWG)]-a tel pahnih, Ningthoujam Kiran Meitei (Boinao), 29, Lairenkabi Mayai Leikai leh Sorokhaibam Inaocha Singh, 45, Salam Mamang Leikai, Imphal West district ve ve chu Inrinni khan an man tih an sawi.
An pahnih hian sorkar department, hotiu lian leh vantlangah pawisa an dil nia sawi an ni a. “An kut atang hian silai mi 75 vel man a ni a. Baofeng two-way radio set pahnih leh charger, bulletproof vest, camouflage helmet, mobile handset, Aadhaar card, backpack leh lirthei pakhat man tel a ni,” an ti.
May 10 khan KCP (Apunba)-a tel, Abujam Manoj Singh, 21 chu Salam Maning Leikai, Imphal West district-ah man a ni a. 5.56 mm caliber mu 46 leh mobile phone an man tel.
Revolutionary People’s Front/People’s Liberation Army (RPF/PLA) mi, Sogolsem Thoithoi (Samson), 44,chu Mayang Langjing Kwaisphai-ah man a ni a. Ani hi sorkar sikul leh vantlang hnena pawisa khawnah puh a ni.
People’s Revolutionary Party of Kangleipak – Progressive [PREPAK (Pro)] mi, Ingudam Ingocha Singh (Borobi), 48, Seijang Makha Leikai, Imphal East district pawh helho hnena ralthuam leh ei leh in petua puhin Chingarel Tejpur-ah man a ni a. Sarangthem Premananda Singh (Nanao), 35, Kakching Khunou pawh Wangoo Chairel Sabam, Kakching district-ah man a ni bawk.
PREPAK-a inziak lut, G5 organisation-a tel, Salam Kifson Luwang (Loya), 26, chu Wahengbam Leikai Lairembi Maning-ah man a ni a. Ani pawh hi Imphal vela mi pawisa laksaka puh a ni.
KCP (Meitei Communist Progressive) mi palite chu Imphal West le Kakching district-ah Zirtawpni khan man an ni.
Zirtawpni vek khan KCP (PWG) mi, Ningombam Jiten Singh (Bikramjit), 45,chu pawisa khawna puhin Thoubal Ningombam Utha Leirak-ah man a ni a. Khangembam Ningthem Meitei (Tomcha), 51, PREPAK (Pro) member pawh Ningel Awang Leikai-ah man a ni a. Ani hi mi pawisa khawn leh dan lova road tax khawnah puh a ni.