Thi thanin Khan-a a thang, Pakistan-in a dam an ti

Thi thanin Khan-a a thang, Pakistan-in a dam an ti
Pakistan-a information & broadcasting ministry chuan prime minister hlui, Imran Khan-a lung inah a thi anga thu darh chiam chu ‘a lem’ a nih thu an puang a, mipuite chu ‘hetiang thu rintlak lo titi’ hnawl ngam turin an chah.
Inrinni chawhma lamah khan foreign affairs ministry thuchhuah ni awm tak, a ni engmah ziah lan loh darhah Khan-a hi lung inah a thi a, a thih chhan leh a kaihhnawih chu chhui zui mek a nih thu tar lan a ni.
Thuchhuahah hian sorkar chuan thil awm dan leh a chhan chu sorkarin langtlang taka tih a duh a, a mawhphurtute pawh mumal taka thil tichiang tura ngaihchan an nih thu tar lan a ni bawk.
Lehkha lem darhah hian, “Pakistan chuan dan hmanga thil tih chu a duh ber ani a. Mihring dikna chanvo humhalh, a bikin lung ina awm laite an dikna anga thil kalpui chu kan mipui rorelna ram nihphung a ni a. Sorkar chuan UN human rights body-te pawh be rawnin mi dang inrawlh lohna, tan lam nei lo chhuitu an awm theih pawh a duh a ni,” tiin tar lan a ni.
Hemi chungchangah hian Inrinni vek chawhnu lam khan ministry chuan thuthar lakhawmtute kawmnin he thu darh hi dik, phuahchawp a nih thu leh a titute chhui mek a nih thu an puang a ni.
Hetih lai hian Zirtawpni khan Khan-a kaihhruai Pakistan Tehreek-i-Insaf party chuan Islamabad High Court-ah an party dintu hi a chhuah theih nan thu an thlen a. Hun rei tak lung ina dah chu a hriselnain a tuar dawn a, tun laia India nena an inkar chhe mek avang pawhin chhuah a ngai niin an thlen.
“Islamabad High Court-ah Khan-a chhuah a nih theih nan dilna thlen a ni a, Chief Minister KP Ali Amin-a hminga thlen a ni a. India nena kan dinhmun mek thlirin kan ram tana tha tur leh inpumkhatna tur leh drone hmanga Adiala Jail beih mai a hlauhawm bawk avangin a rang thei ang bera chhuah lailawk turin kan ngen a ni,” tiin party chuan a puang.
Amin-a chuan an party hian an rama dan leh thupek kawnkawhna tha tawk lo an hria a, thuneitute zawng zawng hnenah dikna an dinchan theih nan an bei tih a sawi a. Khan-a hian a tan chhungin lung ina dan siam a bawhchhe miah lo tih a sawi bawk.
Chief minister hian politics thil avanga rei tak Khan-a hren a ni chu a dikna chanvo palzutna niin a sawi bawk a. An ram danpuiin tuna an man ang chi hi chhuah lailawk phalna a pe niin a sawi a, a hriselna dinhmun tlahniam zel avangin rei tak hren chi a ni lo tih a sawi bawk.