Ruatfela Nu
-- Advertisement --
Thuhma: TBCC chungchangah content duh vanga youtuber chhuak thar (kan mamawh belh tawh loh teh lul nen; thil thleng lian deuh a awmin kan neih belh zel a, a pawi e!) kan neih belh teuh a.
TBCC sawiseltute sawisel ve leh chhawngte nen lam inhmuhmawhna a tam tawh bawk a, chu lam hawi chu sawi lo ila: TBCC ami an thi thin leh, ‘hur sualna hmanga khuaikhem tawk’ nia insawite an awm avangin, Ni, 06.05 2025 khan TBCC chhui chiangtu tur ‘Inquiry Committee’ din turin concern department, social welfare director, hnenah ziakin ka theh lut a, an chhui chian duh loh chuan an thu ni se. He welfare state hi a welfare lo hle tihna a ni ang a, kan tualzal nunah social welfare ni loin, social injustice a tlangnel zawk tihna pawh a ni ang.
Kei pawh TBCC an sawiselna a dik leh dik loh chhui chiang tura thuneitute hnena lehkha ka theh luh vang ngawta min hmu mawh an awm a, a pawi lo e. Zu leh ruihhlo ngawlveina te, hur sualna te, hausak thut duh vanga dan phal loh thila sumdawnnate leh hlemhlêtnate hi, ram inrelbawlna fel hlel rah chhuak a ni a. Kohhran hoin social justice a ngaihthah vang a ni bawk tih hi Bible-ah a inziak chiang em a, ka hnual chuang lo.
Mipui/sawrkar hnathawkte hian eng nge an tih thin?: Social welfare department hnuaiah zu leh ruihhlo ngawlveite enkawl lama mawhphurtu, mahni inrelbawl hrana office changtlung tak nei, thawktu pawh eng nge maw zat awm- Mizoram Social Defense & Rehabilitation Board (MSD&RB) hian, TBCC mualpho tumkhatna leh tumhnihna inkârah eng nge an tih ang tih ka ngaihtuah fo thin a. Engati nge hma an lak sawk sawk loh? MSD&RB nen hian building khat kan luah ho tawh a, de-addiction centre dintute training an pe t, mhin a, TBCC an tel ve ngai lo a ni mai thei e. Kum khata MSD&RB tana sum ruahman (budget) engzat nge ni ang, a beitham viau ang em? Phullem phah ai chuan mihring hi a pawimawh zawk tih hria ram hruaitu kan neih chuan a beitham lutuk lo ang. Tin, hnathawktute hlawh atana kum tin mipui sum (mipui chhiah pek khawm) eng zat nge ni ang? Hetiang zawnga chhut neuh neuh chuan ziaawm ve deuh tur chu kan ni a ni.
FBO leh CBO te’n sawrkar thawh ai an thawk taima a, khawvel pumah ruihhlo chi hrang hrang ngai/ngawlveite chhan chhuah harsatzia chu, zirchianna tam tak awmah ruihhlo ngai enkawl dam /hlawhtlinna rate chu 10% hnuai lam a ni tlangpui a, 07% te a ni. Thihpui tham damlohna khirh tak a ni. Chutiang khawpa thil harsaah chuan sawrkar a inthlahdah em em a, kut a kuangkuah a, dan awmsa pawh a hmang tangkai duh lo a, rinna behchhan pawl (faith base organization/FBO) leh khawtlanga mipui pawl khat (community base organization/CBO) te’n tlawmngaih chhuaha an enkawl zârah sawrkar a kel-e-awl der a! Zahthlak haih haih tak a ni. FBO leh CBO lah an tlawmngai em em a, an tlawmngaih chhan hi an tlawmngai hrim hrim nge sawrkar chak loh vanga kan chhe lutuk tur an ngaingam lo ni ang? A enga pawh chu ni se, sawrkar chuan mipui chhiah pek hmangin chutiang addiction lama thawktu tur a ruai teuh lawi a, ban vek se; chutiang mite hlawh chu kawtthlera zu leh ruihhlo rui man khawmtu, YMA leh zu leh ruihhlo ngawlveite enkawltu, FBO te pe thin tal se, kan ti dawn em ni ang? Kan kalphung hi a ngaihna hriatthiam a har a ni.
America ram aiin kan vannei asin maw le; America ramah, ruihhlo ngaite enkawltu FBO an awm ve lo a, khawlaia mi seng hawitu YMA an nei bawk si lo a, an khawpui hrang hrang lamlian hrulah an rui bu suau suau mai a. Mizoram chu FBO te’n ruihhlo ngai an enkawl thin avangin, ruihhlo ngai an tam ang aiin khaw chhung lamlian sira a huhoa rui bu suau suau hmuh tur an tam lo a; de-addiction centre-ah kan vawm bo duak thin a. Khawlai leh biak inah kan fel fai hmel tlat a lawm.
A nia sin, sawrkar hi bawng ni loa (bawng chuan tawlailir a hnuk thin a, tawlailir hi bawng hmaa a kal chuan buai hun a awm lo thei lo) bawngtawlailir a nih rau rau chuan tawlailir hnuktu, FBO leh CBO te pui sela, mipui sel luai luai ngai loin fel taka de-addiction centre a kal theih a beiseiawm asin. Hetianga, a sawrkar ber a kel-e-awl der thin vang hian, mipui kan chiai zo ta thin a, youtuber hoin min hnuk kual vel mai mai a nih hi. Phung velh ang maiin an pung tawlh tawlh lehnghal!
Engati nge heng dan hi hman a nih loh? The Narcotic Drugs & Psychotropic Substances Act 1985- Section 71(1) chuan ruihhlo ngaite treatment, management, education, after care leh social integration atana tling leh tlin home/centre chu mamawh dan azirin sawrkarin a tam thei ang a dinin emaw, mimal leh pawlin an din te a lo recognize ang tih a chuang a, a chiang hle a ni.
He dan leh section behchhan hian; The Mizoram Management for De-addiction -cum- Rehabilitation Centre (Alcoholic & Drugs Addict) Rules, 1993 kan nei a. Kan lo neih thlip thlep kha sawrkar leh a hnathawk te’n engmah an tih that peih loh avangin an lo utawk tûr vawn mai mai a. Drug addict te pawh chu centre/home lama pawh an uipui tui lian thlir liam mai mai ni awm tak a ni. State sawrkar ve riang ruangin Act, hnuaia Rules eng atan mah a hmang tangkai lo rei lutuk hi a lungchhiatthlak hle a ni.
Dan (act) thupek zam (rule) kaihhruaina (guideline) te hi kan nei tha a sin aw! A hmangtu tur sawrkar hnathawk ho hian an rul-a-raw neih mai mai a. Rul hian rua an nei a, an hmang tangkai lo reng reng a, chutiang vel chu a ni. Police hote hian an hnenah FIR lutte hi misual hrem an nih ngei theih nana chhui chhuah tum ai chuan inbiakrem tir zel hi an duh tawh an tia, tak tak ni maw?! “Jail a tawt lutuk a, inngaidam mai rawh u” te hi an la tih a nia ka rin. Motor accident te hi traffic leh executive police te’n an insawirem tir nasa lutuk a, insurance company an hlawk ngawt ta ve ang! Sual hi kan pawmzam thei khawp a, sual kan pawmzam theih chhan chu Pathian tih lo hnam kan nih vang a ni.
Eng pawh ni se, he rules hian de-addiction, counseling, rehabilitation, after care home in an kalpui dan tur te, an daily routine tur te, vantlang nen an thawhdun dan tur te, enkawltu tur te, doctor leh psychiatrist thlenga nei tur an nih te a sawi vek a. Hetiang taka kaihruaitu tur sawrkar ber a kel-e-awl der avangin tun dinhmuna home/de-addiction centre kalpui mek hote en hian he rules hi an zawm lo a ni. A chhan ber pakhat nia lang chu home run a maintain tur hian financial implication a lian a, tuna kan centre/home neih te erawh mimal, FBO leh gospel team thahnem ngai te’n an din a ni tlangpui a; felfai taka funding emaw an dawng lo a, sawkar atangin support an hmu tha lo bawk a, an kal ve naw naw ni berin alang a. Tute emaw thil pekah an innghat tawp mai a.
Ministry of social justice hnuaia, National Action Plan for Drugs Demand (phek 5-na zawmna…)
Rehabilitation (NAPDDR), centrally sponsored scheme te hi helaia kan home te hian an avail ve phak lo a ang khawp mai a. Sawrkar lamin tan han la thar sela, tuna harsatna kan tawh a zârah Mizoram Drug Treatment cum Rehabilitation Centre Accreditation (Amendment) Rules 2020 pawh an sawi ri ve tawh a. Tun 2020 khan lo peih fel hman sela chuan, he rules hmang hian de-addiction centre khuakhirhin nurse, counselor leh visting doctor te lo pe tal sela chuan centre-a thihna thleng thin a thleng lo ang a, TBCC dintupa pawhin mi sawisel vang mai maiin Pathian thu nena a enkawlte a se-zâwl chhuah lo mai thei a ni. Tichuan, sawrkar ai maha ngialnghet, kohhran tinin an member te tal buaipui thei turin han sang phek bawk sela, ruihhlo ngawlvei piah lama a enkawlna centre/home harsatna hi a ziaawm ngei ngei ang. Kohhran thenkhat a hausa ther thur lutuk hrim hrim hi a tha lo, Pathian theihnghilh a hlauhawm. Biak in ropui leh bank-a tangka an dahte vanramah an chhawm thei dawn chuang si lo. Lal Isua lo kal hunah a chuang hnem lutuk dawn a, a uihawm.
Hmawr bawkna: TBCC sawiseltu sawisel ve lehchhawngtute’n an ngaihtuah phak loh chu, TBCC enkawl laia thihna tawk chhungte rilru na lutuk puak darh thin a ni tih hi. Thihna hi chu a tawp chiang em bawk a. Inrelbâwlna mumal lo vanga lungawilohna, ei leh in chhia, saruaka inbual, tui tlan bawlhhlawh, chhungte thil thawn hmu kim lo, thil an zuar to lutuk etc.,tih vel hi chu a la pawmzam theih a. Zu leh drug ngawlvei an chhungte’n an enkawl theih loh, Pathian thu behchhana din centre-a enkawl ve lem an thi ta mai thin hi an ngaithiam thei lo ni berin ka hria. Kum 2017 a buaina a chhuaha centre-a enkawl mekte an chhuah chum chum tum khan, Pu Zohmingthanga hmai hma ngeiah, ‘Pu Zohming, tuna helna chhuak hi i centre-a mi an thih vang a ni a. Tun tum lo pawh i enkawl lai an thih vanga lungawi lo kan hnenah an rawn complain fo mai. Thihna avangin TNT pawh veng pakhatin an hual tawh. Herald for Christ Children Home, Lungleng pawh home-a an veng naupang thih vangin suasam tumin Aizawl veng lian tak mipuiin an pan hem hem tawh. Mihring hi kan hlu lutuk! Ruihhlo ngawlvei pawh ni mah sela, an chhungte tan chuan an hmangaih leh an mi lungduh, tuma dawmhlum loh leh damdawia enkawlna dawng loa arte thiha thih ringawt hi a na lutuk a ni. Ruihhlo ngaite hi hriselna derdep tak an ni a, heta i enkawlte hi an dam loh chuan damdawi inah dah lut vat zel rawh. Centre-ah ni loin, damdawi inah ngei thi tawh sela, miin an huatna che pawh a ziaawm ngei ngei ang,’ tiin. Khawvelin custodial death a huatzia leh police lock-up leh jail-a mi an thih ngai meuh loh thu pawh ka hrilh zui chiam a. “Ni e” a ti duam duam nghe nghe a ni.
A tawp nan tak tak: Zauthanga Memorial |awngtai Bethel Camping Centre (ZMTBCC) a nih laia thihna tawk vengte’n an au khum vanga a enkawl mekte a chhuahtir hum hum leh TBCC a nih hnu, tuna sawiselna vanga a duh duh chhuah a phal leh si hi a inbuk tawk lo a, a ngheh loh thlak hlein ka hria. Tin, tuna chhuak huk zinga drug overdose-a thi pawiti viaute hian, TBCC-a thite kha pawi an ti viau ang em?