College pahnihah hmunhma thar Mizoram hi horticulture thlai thar chhuahna hmunpui ni thei ram tha – Union minister

College pahnihah hmunhma thar
Mizoram hi horticulture thlai thar chhuahna hmunpui ni thei ram tha
– Union minister
Thenzawl Horticulture College Academic cum Administrative Building leh College of Veterinary Sciences & Animal Husbandry, Selesih-a PG Girls Hostel thar chu Union minister for Agriculture & Farmers’ Welfare Shivraj Singh Chauhan chuan Ningani khan a hawng.
Union minister hian Thenzawla Horticulture College hmunhma thar hi a hmuna hawn tum a ni a. Ningani zing khan Guwahati leh a chhehvelah khua a nawm loh avangin chawpchilh takin a hmuna kal a thulh a. Inbiak hmuh theihna hmangin chawhnu lam khan a hawng ta zawk a ni.
Hemi pual hun hi Mizoram larsap Gen Vijay Kumar Singh (Retd) chuan a office atangin a chhim a, chief minister Lalduhoma chuan Thenzawl Horticulture College hmunah a telpui.
Mizoram chu ram ralmuang leh thlai chi hrang hrang chin theihna ram tha a ni tih Shivraj Singh Chauhan hian a sawi a. Horticulture thlai tharchhuahna hmunpui ni thei khawpa ram tha a nih rualin, tlangram a nih avangte, leilung luangral chak lutuk avangte, kumtin lo neih bansan harsa kan tih avangtein chona lian tak a hmachhawn ve mek tih a sawi.
“Heng kan hmaa chona awm hmachhawn a, kuthnathawktuten hlawkna leh hmasawnna ngelnghet an neih theihnan heng college pahnih hi kan thuamtha zel a ni,” a ti.
Larsap pawhin Mizoram pum zaa 55 chu horticulture hmalak theihna a nih thu leh heng zinga zaa 10 chauh a taka hman tangkai a nih thu a sawi a. FPO, cooperative, supply chain leh market mumal tak hmangin hmasawnna liantham siam theih a ni tih a sawi. Thenzawla Horticulture College din chu sawrkar laipuiin horticulture-a Mizoram theihna hriaa hmasawnna nasa zawk nei tura hma a lakna a ni tih a sawi bawk.
Horticulture College Campus-a hmanpuitu chief minister chuan, Mizoramah horticulture leh animal husbandry behchhana eizawng an tam a, farmer-ten hmasawnna tur an la ngah tih sawiin, an ni tanpui tur hian he college pahnih hian tih theih tam tak an neiin an hria tih a sawi a ni.
Central Agriculture University Imphal vice chancellor Dr Anupam Mishra pawhin thu a sawi a ni.
College of Veterinary Sciences & AH Selesih-a PG Girls Hostel thar hi zirlai 57 awm theihna tur a ni.