Charminar bula kangmei chhuakah mi 17 thi

Charminar bula kangmei chhuakah mi 17 thi
Telengana khawpui, Hyderabad chhinchhiahna pakhat, Charminar bul lawk ina Pathianni tuka kangmei nasa tak chhuakah naupang pariat leh hmeichhe panga telin mi 17 an thi.
Kangmei chhuah chhan hi hriat a la ni lo va, electric kal sual atanga intan a nih erawh rin a ni.
Fire department thuneitu chuan zing dar 06.30-ah kohna dawngin an tlan nghal tih a sawi a. Fire engine 11 hmangin a thelh hna an thawk a, hliam tuarte damdawi inah an dah tih a sawi.
Union Minister G Kishan Reddy chuan Gulzar House huam chhunga kangmei chhuakah hian dawr chung lama chhungkua a tibuai nasa hle tih a sawi a. “A tuartu chhungte ka kawm a, a lungchhiatthlak tak zet a. Tumah mawhpuh ka nei lo va; mahse, police, khawpui enkawltu, fire leh electricity department erawh tihchak a ngai a a ni. Kang thelhtuten hmanraw tha an nei tih ka hrilh a. A tha chi pek thuai tur an ni. Sorkar laipui leh prime minister hnenah pawh thi chhungte chhawmdawlna tur ka sawipui ang,” a ti.
Chief Minister Revanth Reddy chuan he thil thlengin a barakhaih thu leh thuneitute chu chhawmdawlna pea hliam tuarte pawh a tha thei ang bera enkawl turin a ti.
Chhiatna thlenna hmunte hi tlereuh zawrhna intlarna hmun niin Charminar bul lawk a ni a. Heng dawrte hi kum 100 chuanga upa tawhte an ni hlawm.
Telangana Minister Ponnam Prabhakar chuang ruang hmuh tawhte chu damdawi inah lak nghal zel an nih thu leh chanchin kimchang chu sorkarin a la puan zui tur thu a sawi.
Prime Minister Narendra Modi-a pisa pawhin kangmeia thi an awm pawi a tih thu a puang a. “Hliam tuarte lo dam chhuak thuai se ka duh a. PMNRF atangin thite hi Rs. nuai 2-a ral an ni ang a, hliam tuarte chu Rs. 50,000-a kan an ni bawk ang,” tiin PMO chuan X-ah a tar lang.
Deputy Commissioner of Police Sneha Mehra-i chuan inah hian chhuahna pakhat chauh a awm tih a sawi a. “Luhna tur dang siam chawpin hetah hian kang thelhtute pawh an lut a. A chhunga awm tam zawk chuan nikhua an hre lo a ni,” a ti a. “Hmun hlui tawh taka in thar sak tamna a ni a, a hmun panna pawh hi kawng zim tê pakhat chauh awm a ni,” a ti.