Kawtthler lunah Mexico City mayor thawhpui pahnih that
Kawtthler lunah Mexico City mayor thawhpui pahnih that
Motorcycle-a chuang silai kengten Mexico khawpui, Mexico City mayor-a thuihhruai zinga mi pahnih chu mi tam vanglaiin an that a, President Claudia Sheinbaum-i chuan demin ‘a pawi tak zet’ a tih thu a sawi.
Mexican politics-a chanvo pawimawh ber pakhat chelh mek, Clara Brugada-i chuan Thawhlehnia a personal secretary Ximena Guzman leh advisor Jose ‘Pepe’ Munoz te thahna chu ‘amah beihna’ a nih thu a sawi.
Thuneitute chuan an thah chhan chhuiin surveillance camera-in thla a lo lak fuhte enin a titute hriat an tum tih mayor hian a sawi bawk.
“Theihnghilh an ni dawn lo. A titute hi manin an phu ang hremna an hmu ngei ang,” tiin Brugada-i chuan a sawi.
Thuthar lakhawmtute a kawmnaah mayor hian a kaihhruai sorkar chuan ‘him lohna nasa tak awm mek chu an bei zel dawn’ tih sawiin thite sun nan minute khat ngawi rengin a ding bawk.
Forensic thuneitute chuan khawpuia hmun lun lai taka tualthahna thlenna hmunah hian finfiahna awm theihte an la khawm a, police officer-ten an awmchilh bawk.
Thah takte chuanna car bulah puan vara khuh ruang dah a ni a, car hi a tukverh darthlalangte a keh nuaih bawk tih thlalak thehdarhah a lang.
Guzman leh Munoz te hi Sheinbaum-i kaihhruai Morena party mi ve ve an ni a, an party tho hi Mexico City-a sorkar lai an ni bawk.
Brugada-i pawh hi Sheinbaum-i nena inpawm tak niin president hi mi maktaduai kua chenna khawpuiah hian mayor pawh a lo ni ve tawh nghe nghe a, nikum khan an ram hruaitu lu ber nihna hi a chelh tan.
Mexico hi tualthahna thlen tamna ber ram zinga mi niin kum 2006 hnuah mi 4,80,000 zet thah an ni tawh.
Latin American ramah hian hmun hrang hrangah ruihhlo tawlh pawl rawng tak takten tharum an thawh nasat laiin an khawpui ber hi a muanawm phian thin thung.
Hmun dangah chuan mi sual rual pawi khawihna hi politician leh an thawhpuiten an tuar nasa hle a, Mexico City-ah tak erawh a thleng tam lo hle.
Hriat hlawh taka Mexico City-a mi sual chetna chu June, 2020-a khawlaia security chief Omar Garcia Harfuch-a beihna kha niin a vangtu pahnih leh an bul hnaia awm pakhat kah hlumsak a ni.
Hemi tum hian Harfuch-a pawh hian hliam a tuar a, a titu-ah hian tun hnai lawka US President Donald Trump-a’n firfiak pawla a puan, ruihhlo tawlhtu pawl hriat hlawh tak, Jalisco New Generation Cartel a puh nghe nghe.
July thla khan Mexico City police special operations chief, Milton Figueroa-a chu thah a lo ni tawh bawk.
Harfuch-a hi Sheinbaum-i national security minister a ni mek a, a pisa chuan Thawhlehnia mayor thawhpuite thattu chhuinaah an puih dawn thu a sawi a. “Dawihzep taka chete hi hrem lohvin kan chhuah dawn lo,” tiin X-ah a tar lang.