Thiante nena insawh insawh ringawt lovin a chhungah Sailova

Tunge a nih inzawh a ngai lo; Vanlalsailova a ni a, music tui lem lote pawhin a hming an hria. Politics a luhchilh ta a, a thawm pawh a ring nghal.
Thawhtanni zan khan Sailova hian ZPM a zawm a, a zan la lain Zoram a deng chhuak nghal tih theih a ni. A duhna berah a lut tih a sawi a, ram tana theihtawp chhuah a tum thu a sawi bawk.
“Sitting room-ah thiante nen kan insawh kan insawh a, insawh insawh ringawt lova a chhunga luh hi a tul a, ground level atanga tang turin ka lut a ni,” tiin politics-a a luh chhan a sawi.
“Tun dinhmunah chuan ka duh ber an ni,” tiin a luhna party chungchang a sawi a, “Party pathum duhthlan tur a awm a, tun dinhmunah chuan en chhin tur, an chanchin a chhia a tha sawi tur awm lo an ni,” a ti. “Party hmasa pahnihte hi an tawp ta viau e ka ti a ni lo a, mahse an zia leh an kal dan kan hre tawh a, chutih laiin a thar an lo awm a,” a ti bawk.
Inthlanpui a hnai a, Sailova’n ZPM a zawm tih an hriata mite rilru-a zawhna awm nghal chu, inthlanah a ding dawn em tih a ni ngei ang. “Kan hotute thu thu,” amah chuan a ti.
Ding turin a inpeih em tia zawhna chhangin Sailova chuan, “Keima lam chu, ding turin ka inpeih,” a ti a, mahse Pathian leh an party hruaitute thu thu a nih thu a sawi.
Party-a lut turin theih ang tawkin a inbuatsaih tih a sawi a, Bible-ah “In zîngah tu pawhin finna a tlakchham chuan, mi zawng zawng hnêna hau lova phal taka pe thintu Pathian chu dil rawh se, pek a ni ang,” tih a nih thu sawiin, “Zei sa leh thiam sa an awm lo,” a ti.
“Tawnhriat hian mihring hi thiamna a pe,” a ti a, “Kan hruaitu hmasate pawh, bul an tan tirhin experience an nei lo. Tumruhna leh tawnhriat hmangin an inhaikua a ni,” a ti.
MLA nih a chak leh chak loh chungchang chu, 50-50 a ni tiin a chhang a, “Hah leh buai a tel dawn a. Mahse bial mipuite tana hah leh buai a ni dawn a,” a ti.
“Ka goal leh vision-ah ka chiang,” a ti a, ram tana thawk turin a chhunga luh a tul a, a chhung atanga thawk turin ZPM a zawm tih a sawi bawk.