CM-in Union minister-te kawm
CM-in Union minister-te kawm
New Delhi-a kal chief minister Lalduhoma chuan Union minister hrang hrang a hmuh chhunzawm zel a, Mizoram mamawh a thlen.
Defence minister Rajnath Singh a hmuhnaah chief minister chuan Mizo Territorial Army Battalion din a nih theihna kawnga hma a lakpuinaah lawmthu a hrilh a. He battalion hi kumin June atanga bul tan tur a nih thu leh Mizo thalaite tan hna siamtu pawimawh tak a nih tur thu a hrilh.
Mizoram kawngpuite tha zawka enkawl theihna turin national highway leh state highway chu strategic highways-a puansak turin a thlen bawk.
Defence minister hian Mizorama private school-te chu Sainik School nen public private partnership (PPP) model-a thawhdun theih a nih thu a lo sawi a. Private school-te hian online-a application an thehluh a ngaih thu leh, private school thlanchhuah hi Sainik School anga pawm theih an nih thu chief minister hnenah hian a lo sawi a ni.
Union minister for DoNER Jyotiraditya Scindia a hmuhnaah chief minister hian Thenzawl chu DoNER hnuaia ‘global model site’ atana thlan anih avangin lawmthu a hrilh a. Thenzawl Golf Course thuamthaa international standard-a siamna tur proposal kal mek chu sawipuiin Union minister hian a lo bawhzui tur thu a lo hrilh.
Mizoram thlai tharchhuah, a bikin sawhthing leh Mizo hmarchate hralhna bakah sports sector tihhmasawn kawngah Mizoram chu theihtawp a lo chhuahpui tur thu Union minister hian a sawi bawk.
Union Civil Aviation minister Ram Mohan Naidu hnenah aviation sector-a Mizoram hmasawnna tur a sawipui a. Mizoram chhim lamah airport din turin a ngen.
AAI kuta Lengpui Airport hlan chungchang pawh an sawi a. PM- UDAN Scheme hnuaia heliport din dan tur an sawi bawk.
Union minister hian Mizoram chhimlama airport siam a nih theihnan hma a lak tur thu hrilhin, an inkawmnaa tel ve AAI thuneitute chu a ranglama Mizoram sawrkar hnena Lengpui Airport offer siam turin a ti. An offer hi Mizoram sawrkarin a lo zirchiang leh phawt dawn tih sawi a ni.
Union minister for Consumer Affairs, Food and Public Distribution Pralhad Joshi a kawmnaah Lalduhoma chuan National Food Security Act (NFSA) hnuaia hamthatna dawngtu (beneficiary) tihpun sak turin a ngen.
Mizorama ration card nei mek zaa 60.26 chauh NFSA hnuaiah an awm, tiin, hamthatna dawngtu zat hi mi nuai 1.7-a tihpunsak turin a ngen a ni.
Union minister for Minority Affairs Kiren Rijiju a hmuhnaah Mizorama PMJVK hnuaia project pawimawh zual an endun a, hmalak zel dan tur a sawipui bawk.