Sawrkara accreditation ti home/ centre tan buhfai man tlawm bik

Sawrkara accreditation ti home/
centre tan buhfai man tlawm bik
Sawrkara accreditation ti home/centre tan buhfai man tlawm bika lei tir an ni tawh dawn a, hemi kaihhnawihah hian Thawhlehni khan Social Welfare department leh FCS&CA department chuan thawhdunna thuthlung an ziak.
Social Welfare minister Lalrinpuii chuan deaddiction leh rehabilitation centre chu rawngbawlna pawimawh tak kalpuitu an nih angin an buhfai mamawh rang leh dik zawka pek kawngah helam buaipuitu department nen an thawk dun chu hmasawnna tha tak a ni tih a sawi.
Centre leh home – mimal, pawl leh kohhran din ten mamawhna tam tak an phuhru thin chu a lawmawm rualin, sawrkar inkaihhruaina zawm turin dan hnuaiah accreditation tih vek tawh tur a ni tih sawiin, “Accreditation ti chuan buhfai tlawmin an lei thei chhunzawm dawn a. He dan hnuaia inziaklut lo chu hlamchhiah an ni dawn tihna ni chuang lo mah se, an buhfai lei theihna a to hret a, Mizoram Special Ration Package angin kg.ah Rs.20 a lei a ngai dawn a ni,” a ti.
Welfare Institutions & Hostel Scheme (WI&HS) kaltlanga Mizorama welfare institutions (WI), a bikin sawrkar dan zawma din de-addiction leh rehabilitation centre hnena buhfai man tlawma pek thina thawhdunna thuthlung ziah hi a tum khatna a ni a. FCS&CA minister B Lalchhanzova pawhin WI buhfai chu thla 6 dana lokal thin a nih avangin home leh centre tamtak an buai fo thin tihrehna atan Supply department chuan an buhfai stock sa atangin thla tin quota an lo pe anga, central atanga WI buhfai lo thlen hunah siamrem mai thin a ni dawn tih a sawi a ni.
Mizoramah welfare institution 116 leh hostel 87, a vaiin 203 awm mekah mi 14748 an awm mek niin May 27 hian chhinchhiah a ni. An pual hian sawrkar laipui atangin mi pakhat tan thla khatah buhfai kg 15, kg-a Rs.6 rate-a dawn thin a ni. He buhfai hi sawrkar laipuiin thla 6 danah a pe thin.
Social Welfare department-in a hriat theih chinah tunah hian ruihhlo ngai enkawlna home Mizoramah 44 a awm a, heng zingah hian kohhran centre 8 awmin, sawrkarin Social Welfare department kaltlanga a din centre pahnih a awm a, a bak zawng chu mimal leh tlawmngai pawl din a ni.
Inremna thuthlung ziah ang chuan:
8 State sawrkar guidelines zawm leh Social Welfare department hriatpui centre chauhin buhfai tlawm hi an dawng thei ang
8 Sawrkar laipui atanga buhfai man tlawm dawn khat a nih avanga harsatna phuhru turin FCS&CA department-in thla tin an quota advance-a dawn theihna turin rem a ruat anga, June 2025 atangin a pe tan ang. Sawrkar laipui atanga quota a lo thlen hunah siamrem a ni ang.
8 Social Welfare department-in an enkawl centre-a patients awm zat thla tinin an certify anga, FCS&CA department hnenah a thawn thin ang.
8 FCS&CA department-in sawrkar laipui hnena thawn tur information leh thil tul dang a buaipui ang.
8 Centre buhfai dawn audit a ngaih tawh avangin Social Welfare department-in an centre enkawl audit an buaipui ang.