Police-in phone bo an hmuh let a neitute pe

Police-in phone bo an
hmuh let a neitute pe
Aizawl Police Station chuan mobile phone bo an ziahluh, CEIR application hmanga an hmuh let ho chu a neitute hnenah an pe let.
Mobile phone bo hmuh let neitute hnena pek letnaah Aizawl Police Station officer -in- charge Lalnunmawia chuan, kumin April atang khan mobile phone bo, Aizawl PS-a report chu CEIR app hmangin an chhui tan a; tun thlengin mobile phone bo 33 vel an hmu let tawh tih a sawi. Tun tuma a neitute hnena an hlan let hi tun May thla chhunga an hmuh let 12 a ni tih a sawi bawk.
Aizawl Police Station OC chuan, mobile phone tibo leh ruksak tawk chu police station-a report turin an ngen tih a sawi a. Anni’n theihtawp an lo chhuah pui tur thu a sawi. Zaa za hmu let leh lo mah se, a tam zawk hmuh let leh ngei tumin tan an lo lak pui dawn tih a sawi a ni.
Mobile phone bo hmuh let 12 hi Aizawl South SDPO thar H Lalduata leh officer dangten a neitute hnenah an pe a ni.