Barca ah Yamal a rinawm

Kum 17 mi lek ni chunga khawvela footballer tha ber zinga chhiar tel ni der tawh Lamine Yamal chu FC Barcelona-ah rinawmna thu a tiam thar leh a, kum 2031 thleng cham turin contract thar a ziak.
Player hmuhnawm, khelmual chhunga puitlin em em mai Yamal hian kum 2023 khan kum 2023 chauha upa ni chungin Barcelona senior team a zawm a, a contract neih mek hi kum 2025-26 season tawp ruala tawp tur a ni. Contract la hmang zo lo mah se Barcelona in contract thar ziahpuiin thlun ngheh thuai an duh a, contract thar tha zawk an ziahpui fel thei ta a. Yamal-a’n contract a thar a ziak hi Barcelona president Joan Laporta leh sporting director Deco ten an tawiawm.
July thlaa kum 18 tling ve tawh tur Yamal hi season liam taah khan a khel tha leh zual hle a, Spain tualchhunga inelna lian pathum; La Liga, Copa del Rey leh Super Cup-ah te a champion pui a, treble champion a nihpui. Spain tualchhungah treble champion an nih theih nan Yamal hian a thawhhlawk viau a, Catalan club lian player pawimawh a ni. La Liga, Copa del Rey leh Super Cup ahte champion bawk mah se UEFA Champions League-ah erawh uiawm takin final an lut zo lo thung. Champions League final lutin, champion ngat ni se Yamal hian kum naupangte ni chungin Ballon d’Or a dawn theih hial a rinawm. Champions League final lut zo lo mah se Yamal hi Ballon d’Or dawng tura rinkai zingah a la tel tho thung.
Barcelona academy La Masia atanga inzirchhuak, thiamna ril pianpuitu Lamine Yamal hian kum 17 mi lek ni chungin Barcelona Senior team tan vawi 55 khelin goal 18 a thun a, assist vawi 25 zet a nei tling tawh bawk. Khawvela footballer ropui ber Lionel Messi hian kum 17 mi a nih laiin Barcelona senior team tan goal a thun miah lova, hei hi Yamal ropui bikzia sawifiahna awlsam a ni. Kum naupang te ni chungin football thiam ram Spain tan vawi 19 lai a khel tling der tawh a, Spain hi Euro-ah a champion pui tawh nghe nghe a, hnuhma a nei tha hle.