Kawnpui leh Sairang inkar four lane sialna tur pe rang turin ngen

Kawnpui leh Sairang inkar four
lane sialna tur pe rang turin ngen
Mizoram tlawha lo zin Union minister of state for Road Transport & Highways Ajay Tamta leh chief minister Lalduhoma chu Thawhlehni khan an inkawm a. Silchar – Aizawl four lane laih mekah Kawnpui leh Sairang inkar hnathawhna tur sum pe chhuak rang turin a lo ngen.
Chief minister chuan he kawngpui hi India ram laili nena kan inkalpawhna kawngpui pawimawh bik a ni, tiin, Kawnpui leh Sairang inkar chu kut thlak a nih rih loh avangin nikum furah nasa takin Mizoram-in harsatna a tawk tawh a, kuminah kan tawk leh mek tih a sawi.
“Hemi inkar hnathawhna tur sum hi sawrkar laipuiin min la pe chhuak loa, rang taka min pek a, hna tan thuai kan ngai a ni,” tiin, Mizoram chak lakna kawngpui berah hnathawh chak a ngai tih a lo hrilh.
Mizorama national highway ho chu awlsam zawk leh rang zawka thawh a nih theihnan ‘strategic highway’ a puan tha a tih thu chief minister hian a sawi a. Fur ruahtui tlak tamna ram a nih vanga concrete zela kawngpui siam tha a tih thu sawiin, concrete chu a thawhna senso sang mah se, a enkawl zuina man a hniam a, a tlo bawk tih a lo hrilh.
Hei bakah hian heliport din tura hmalakna kal mek chanchin a lo sawipui bawk.
Union MoS chuan chief minister thil sawi chu theihtawp chhuahin a lo bawhzui tih a sawi a ni.