Raltlante an harsa takzet – ZORO

Raltlante an harsa takzet – ZORO
Myanmar ram buai avanga Mizoram chhimlam leh hmundanga raltlan lut, a hlawma dahte chu an dinhmun a harsa takzet tih Zo Reunification Organisation chuan an sawi a. An tana thil tih sak ngai hrang hrang nia an ngaih zingah refugee status an neih theih nan United Nations lama bawhzui pui an ngai hle tih an sawi.
ZORO Gen. Hqrs. hruaitute sawi danin, Myanmar ram buai avanga Mizorama raltlante pawl leh mimalten ei leh bar bakah silh leh fen te theih ang tawka pek ni mah se, kum hnih dawn lai a ral hnu chuan tanpuina a rem tan a, a nawlpuia mahnia eizawnna bul tanna tur nei lo an nih avangin an khawsak a harsa hle a, sawrkarin a puih thuai loh chuan chaw nghei thei hial an ni ta, tiin, an ni pawhin vehbur khawn sak an rel tih an sawi a ni.
Raltlante hi a rem rema Mizoram lama rawn lut bawrh bawrh, thenkhat ramri kan na kianga awm zui nghal an awm laiin, thenkhat chu hmun hla tak tak pan an awm tih an sawi a. An tlanchhiatna khua hi khawfem, khaw te leh eizawnna kawngah pawh harsa ve tak tak an nih thu sawiin mau, di leh silpauline ten an awmna tur camp sak a ni a. Fur khawchhe karah phei chuan an chenna hi a him tawk lo hle a, ngaihtuahpui an ngai tih an sawi.
Nausen atanga kum upa tak, thenkhat chu an hriselna pan tak, natna benvawn nei, pianphunga rualban lohna nei, tawngtheilo leh an ei chhiat avanga damlohna in a tlakbuak mek an awm tih ZORO hian sawiin, an tan damdawi in panna a hla tlangpui a; sum an neih loh avangin ambulance koh a ngaih chang leh damlohnaah damdawi tak ngial pawh an neih loh chang a tam a, an hriselna lam enkawlpui an mamawh hle tih an sawi bawk.
State sawrkarin an ei leh bar, dan hnuaia an eizawnna awm dap pui, an hriselna bakah zirna lam thlenga a enpui ngai an tih thu an sawi a. India sawrkarin raltlan anga a puih theih loh avangin UNHCR lamah refugee status an neih theih nan bawhzui pui an mamawh hle tih an sawi a, ramdang rampawnah chhuak thei se, an khawsakna pawh a ziaawm ngei an beisei pui tih an sawi a ni.