UEFA Nations League Champion Portugal

UEFA Nations League
Champion Portugal

Pathianni zan khan UEFA Nations League final khelh a ni a, inkhel hmuhnawm takah Portugal chuan champion lai Spain chu penalty shoot out ah an hneh a, a vawihnih nan an champion.
Final ah hian champion lai Spain in bul an tan tha a, goal thun hmasa zawkah an tang. Arsenal nena sawi zawm hlawh mek Martin Zubimendi chuan hnaite atangin a pet goal a, hmahruaina goal a thun. Ball chang tam zawk Spain in goal thun hmasa mah se Portugal an hawihil rei lova, an khingpuite an chhanglet thuai. Final a langsar tak Nuno Mendez chuan tha zetin lei hrulah a pet goal a, minute 26 naah an si phurh a sut. Inkhel hmuhnawm takah hian goal lut a awm belh theih loh reng hnuin Mikel Oyarzabal chuan minute 45 naah fing zetin a pet goal a, hma an hruai nawn lehna goal a thun. Spain hian 2-1 a hmahruai chungin chawlhlawk an hmang.
Chawlhlawk hnu lamah Portugal an khel tha leh zual a, inkhel hmuhnawm zawk hmuh tur a awm. Portugal tan hian captain Cristiano Ronaldo chuan vanneihthlak ang reng takin hun tha a hmu a, minute 61-naah hnaite atang pet goal in an si phurh a sut.
Goal hnih ve ve an thun hnuin inkhel a hmuhnawm zui hle. Goal thun tumin innawr tawn nasa viau mahse hun pangai leh extra time ah goal thun belh thei an awm tawh lo va, tie-break hmangin champion tur zawk chinfel a ni. Penalty shootout ah hian Spain tana pettu Alvaro Morata-an a thelh laiin Portugal tana pettuten an thun vek thung a. Portugal hian 5-3 in hnehna an chang a, a vawi hnih nan Nation League ah an champion zui ta a ni.
Final ah Spain leh Portugal te an intum tuma player hmuhnawm leh langsar ber chu Portugal defen Nuno Mendes a ni a. Mendes hian defender ni chungin goal khat a thun a, assist vawi khat a nei bawk. A chet that em vangin Spain innghahna Lamine Yamal chu a duh angin a chet theih loh phah a. Yamal a veng hneh hi Potugal tan tangkai tak a ni.