Jimin leh Jung Kook sipai atangin chhuak

Jimin leh Jung Kook sipai atangin chhuak
BTS member pahnih Jimin leh Jung Kook te chuan an sipai nunchan zir hun chhung zoin, nimin khan sipai atangin an chhuak ve leh ta a, heti hian BTS member pasarih zinga paruk te chuan an sipai tan hun chhung an zo ta a ni.
South Korea-ah hian mipa pangngai te chu kum 18 an tlin atanga kum 35 an pelh hma ngeiin an ram sipaiah thla 18 tal sipai nunchan zirin an inziak lut ngei ngei tur a ni a, BTS member te pawhin an ram kalphung hi zawmin sipai nunchan zirin an inziak lut vek a, tun thla tawp lam hian an member sipai tan hun la zo lo awm chhun Suga pawh a rawn chhuak ve leh thei tawh dawn bawk a ni.
Jimin leh Jung Kook te hi sipai atanga an chhuah hian Yeoncheon Public Stadium, Gyeonggi Province, South Korea-ah fans ten an lo lawm a. Jimin leh Jung Kook te pawh hlim takin anmani lo hmuaktu te hmaah an inlan.
Jimin chuan, “Fans leh reporter min lawm tura rawn kal zawng zawng chungah kan lawm e. Hripui len atanga sipai nunchan zir zawh thleng chu a rei ve ngar ngar khawp mai. Tunah chuan kan rawn kir leh ta bawk a, kan hmachhawp te chhawp chhuah sak tur che u in theih tawp kan han chhuah ang e,” a ti.
Jung Kook pawhin, “Theihnghilh tawh loh tur thil tam tak a awm a. Kan zin kawng min zawhpuitu leh min support tu zawng zawng chungah lawmthu kan sawi. Tunah chuan ka rawn chhuak ta bawk a, kan lo suangtuah thin te a taka chantir a hun tain ka hria. |ha takin kan inbuatsaih ang a, intan kan rawn chhawp chhuak thuai ang. Sipai nun chu thil awlsam tak a ni lem lo, mahse, hriatreng tur thil tam tak ka tawn avangin ka lawm a ni. Khawlaia sipai i hmuh a, zahna chibai i buk khan awmze thui tak a nei thei a nia,” a ti ve bawk.
Jimin leh Jung Kook te hi 2023 kum chawhnu lam khan sipaiah inziak lutin, boot camp pakhatah an training dun a, chumi hnuah unit hranah an kal tir leh ta a ni. Jimin hi 5th Infantry Division a military band-ah telin, Jung Kook hian Beakma Division-ah a service a zo ve thung.
Sipai thuam an inbel chhung pawhin heng BTS member pahnih te hian rimawi khawvelah thawm lian tak an nei zui reng tho a, Jimin hian history siamin, a album ‘FACE’ a hla ‘Like Crazy’ chu Billboard Hot 100 (singles) chart-ah No.1 kaiin, Korean solo artist zinga he chart-a No.1 kai thei hmasa ber a ni a, Jung Kook solo debut album GOLDEN pawh Billboard 200 (albums) chart-ah No.2 a kai thei bawk.
BTS hi 2023 atang khan group anga an chetvelna a awm tawh lo a, mahse, tunah chuan Jin, J-Hope, RM, V, Jimin leh Jung Kook te sipai tan hun chhung a zo ta a, Suga pawh tun thla tawpa rawn chhuak ve leh tawh mai tur a ni bawk a, group anga an thawm pawh kan ngaithla leh har tawh lo ang.
An huhoa mipui hmaa an inlan lehna hmasa ber tura ngaih chu 2025 BTS FESTA a ni a, hei hi June ni 13-14 hian KINTEX, Goyang, South Korea-ah neih a ni dawn a, he event hi khawvel hmun hrang hranga fans tan BTS homecoming celebration pui tak leh BTS bung thar kaina tur a ni ngei dawn e.