Hollywood star zinga an channa sum lak luh tama record siamtu Tom Holland

Hollywood star zinga an channa sum lak luh tama record siamtu Tom Holland
Tom Holland chu kum 30 mi chauh a la ni a, tunlai hian a film channa pahnih Spider-Man: Brand New Day leh The Odyssey te chuan sum an la lut tha hle a, record an siam deuh mawlh mawlh a, amah Tom Holland ngei pawhin record siamin, Hollywood star zinga an channa film cinema hall ticket hralhna atanga sum lak luh belh khawm a tam ber a ni ta.
Tom Holland film channa hrang hrang ten cinema hall ticket hralhna atanga sum an hmuh belhkhawm chu dollar tluklehdingawn 15.5 a tling ta niin ComicBook.com chuan an tarlang.
Tom Holland hi Spider-Man film pali-ah a changtupa, Spider-Man lemah a chang ta a, a channa thar ber leh Spider-Man film a chan palina Spider-Man: Brand New Day-in tun weekend kalta khan cinema hall ticket hralhna atangin dollar maktaduai 27.4 a lak luh belh leh a, heti hian he film sum lak luh belhkhawm chu dollar tluklehdingawn 2.452 a tling ta a, a channa dang The Odyssey-in dollar maktaduai 34.4 lak luh belh bawkin, he film sum hmuh belhkhawm pawh dollar tluklehdingawn 1.68 a tling ta bawk.
A hmaa heti lama record siamtu hi Avatar changtunu Zoe Seldana niin, Avatar film thar ber Avatar: Fire and Ash a hlawhtlin leh viau hnuah a channa hrang hrang cinema hall ticket hralhna sum lak luh belhkhawm chu dollar tluklehdingawn 15.468 a ni a, hei hi Tom Holland hian a rawn khum ta chiah a ni.
Zoe Seldana hmaa he record siamtu chu Scarlett Johansson (dollar tluklehdingawn 15.401) niin, Samuel L Jackson (dollar tluklehdingawn 14.6), Robert Downey Jr. (dollar tlukledingawn 14.3) leh Chris Pratt (dollar tluklehdingawn 14.1) ten an dawt.