Khawvela hausa ber dawttu Larry Ellison

Khawvela hausa ber dawttu Larry Ellison
Amazon founder leh CEO ni thin Jeff Bezos chuan khawvela hausa ber dawttu nihna title chu Oracle founder Larry Ellison lakah a hloh ta tlat. Forbes World Billionaires List-a a lan danin Ellison hausakna hi Ningani kalta khan dollar tluklehdingawn 26-in a pung thut a, hei hi Billionaire zingah pawh ni khat thil thuta hausakna pung nasa ber record a la ni a, Larry Ellison hlutna chu dollar tluklehdingawn 243-ah a kai ta dawrh mai a ni.
Jeff Bezos hausakna hi dollar tluklehdingawn 227 niin Forbes chuan an tarlang a, Facebook neitupa, Meta CEO Mark Zuckerberg hausakna pawh dollar tluklehdingawn 239 niin an tarlang bawk a, Larry Ellison hian hausak lamah khum ve vein, Tesla CEO Elon Musk chiah a pha ta lo a, Musk hausakna hi dollar tluklehdingawn 407.3 niin Forbes chuan an tarlang bawk.
Ellison hausakna pun thutna chhan hi Oracle kumin quarter hnihna (April-June) chhunga a thawhchhuah a pun nasat vang a ni a, company share pakhat hlutna pawhin a vawi khat nan dollar 200 a pel ta a ni.
Hetihrual hian khawvela hausa ber Elon Musk hausakna pawh dollar maktaduai 191-in a pung leh thut e! Tun tum Musk hausakna pun lehna chhan chu X a US President Donald Trump laka thupha chawina a post vang a ni. Musk hian Donald Trump-a sorkara a dinhmun pawimawh a kalsan hnuah Trump hi a sawi chhe zui vak vak a, hei hi a sumdawnna pawhin tuarin, SpaceX leh Tesla hlutna te a tlahniam a, mahse, kar kalta a Musk leh Trump-a phone-a an inbiak hnuah, an inkar boruak sa a daih leh ta deuh nia a lan velah Musk-a hausakna pawh a pung leh tan ta a ni!