India-ah April aiin May-ah hna nei lo tam zawk

India-ah April aiin May-ah hna nei lo tam zawk
India-a hna nei lo awm zat chu April thlaa 5.1% atangin May thlaah 5.6%-ah a kai a, hei hi thlai thar seng hun a liam tawh avang a ni ber niin statistics ministry-in Thawhtannia inchhiarna a tihchhuah tharah a tar lang.
Tun tum hi India-a khawpui leh thingtlanga hna nei leh nei lo chhiarna thla tin tihchhuah thin tura vawi hnih tihchhuahna a ni a. A hma kha chuan sorkar hian employment data hi khawpui bik chhiarna thla thum danah tichhuakin thingtlang nena a inkawpin kum khatah vawi khat tihchhuah thin a ni.
Asia-a economy lian ber pathumna ram hi kum liam ta tawp thla thum, January-March chhungin a economy chu 7.4-in a thang a, April thla atanga kum thar intan kum thar kal mekah 6.5%-a thang tura beisei niin kum liam ta ang vela thang tura rin a ni.
May thlaah hian hmeichhe hna nei lo chu 5.8% niin mipa (5.6%)-in an tam zawk hret tih tar lan a ni.
Khawpuia thalai, kum 15 leh 29 inkar zingah hna nei lo hi pungin April thlaah 17.2% a nih laiin May-ah chuan 17.9% a ni a. He mi chhung hian hna thawh lai chân chu 12.3% atangin 13.7%-ah a kai bawk.
Thingtlang lamah erawh hna hi lo lam atangin thil siamna leh service lamah a inlet deuh duak a. April thlaa lo lama thawk chu 45.9% an nih laiin May-ah chuan 43.5% a ni tawh a, hei hi lova thlai thar seng a zo tawh a, thawh tur a tam tawh rih loh vang a ni ber.
Lo lam hna a tam tawh rih lo hi thingtlanga hmeichhiate pawhin an tuar hle a, April thlaa 28.8% thawk thin kha May-ah chuan 27.8%-ah a tla thla a ni.
India-ah hian thil siam chhuahna lam chu May thla thlengin a hma thla hnih atangin a thang muang hle a, a than chak loh hun lai ber a tawh a. Hei hi a hma lama a man sang lutuk avang leh ram dangah boruak duhawm lo tak tak a awm vang niin zir chiannaah hmuh a ni.