Ar note thartu ZPDS-in sawrkar sumbawmah nuai 33 chhunglut

Ar note thartu ZPDS-in sawrkar
sumbawmah nuai 33 chhunglut
Ar note thar lama hma latu Zoram Poultry Development Society chuan kum 10 chhungin sawrkar sum bawmah cheng nuai 33 chuang a chhunglut tawh.
AH & Vety department-in a enkawlpui Zoram Poultry Development Society (ZPDS) Tanhril hian kum 10 a tlin a lawm a. 2015 May 18 khan AH&Vety department farm ‘Regional Broiler Chicken Farm’ Tanhril awmna thinah din a ni. A tirah NABARD RIDF (XVII) 2012 leh RVVY sum hmangin ar note kar khata 20000 thar thei tura din a ni a, NABARD RIDF (XXVI) 2020-21 sum leh SASCE 2021-22 sum hmangin kar khata ar note 40000 ve ve thar theihna tura tihlen niin, tunah hian karkhatah ar note 100000 thar theihna khawl a awm mek.
Kum 2024- 2025 audit report-a a lan danin, operational value Rs 1,05,30,313.50 a ni a, kum khat profit margin atanga 25% hi sawrkar revenue-a chhunluh thin a ni. Kum 2016-2017 atanga kumin 2024- 2025 thlenga revenue chhunluh tawh hi Rs 33,63,984.89 a ni.
Kum 10 tlin lawmna hmanpuitu AH& Vety minister C Lalsawivunga chuan, ram intodelhna tura kawng an lo ngaihtuahnaah ZPDS hotu hmasate chungah lawmthu a sawi a. Thlen chinah lawmna tur tam tak awm mah se, hmasawn zel turin a fuih. Mipui hnenah ar leh artui man tlawm zawka pechhuak thei turin duhsakna a hlan a, sawrkar hmalakna in Thenzawlah artui thar tam turin Mega Egg project kalpui mek a ni a, ranchawa intodelh turin vaimin tharna tur project siam mek a ni tih a sawi bawk.
ZPDS hian Governing Body a neih bakah thawktu – managing director 1 leh staff 15 an awm mek.