Kawng chhiat vangin harsatna la tawk reng

Mizoramin ni tin mamawh thil a lakluhna kawngpui pawimawh a chhiat avangin bungraw phurtute’n harsatna an tawk nasa a, tunah pawh he harsatna hi an la tawk. Lirthei tlan pawh a hma aiin a tlem tih thu dawn a ni.
Vairengte leh Aizawl inkar kawng a chhiat avang hian, Mizoram Truck Owners Association leh Mizoram Truck Drivers Association te’n May ni 23 atanga tlan loh an lo tum tawh a, sorkarin siam a tum avangin hei hi an thulh. Mahse June thla chawhnu lamah pawh kawng hi a la chhia a, harsatna hi a la ngai reng tih an hruaitute’n an sawi.
“Sorkar hian eng eng emaw chu an ti ngei a, mahse a chhe zual laia lung vawm khawm kha a ni mai a, rei a daih lo. An black top lo a, ni khatah truck 200-300 te a tlan avangin, hmun thenkhata lung vawm khawm ringawt kha eng tham a ni lo,” Mizoram Truck Owners Association hruaitute chuan an ti.
A hma aiin tun hnaiah truck tlan a tlem a, buhfai phur tur pawh an awm meuh lo tih an sawi.
Kawng chhiaa tlan hi a hlauhawm bakah lirtheiin a tuar a, sum leh pai a heh em avangin, tlan loh hi a hlawk zawk ti hiala sawi te pawh an awm thu an sawi a, kawngah an thang rei thin avangin a hautak tih an sawi bawk.
Truck tlu pawh a la awm a, thla hmasa lam ang em kha chu a ni lo an ti. Tlan thang lo an awm a, tlan thang chuan a tih dan an thiam tawh a, chuvang chuan an tlu nasa ta lo nia an hriat thu an sawi.
Tun hnaiah Kolasib Tippers Association-in hnatlan an rawt a, Mizoram Truck Owners Association leh Mizoram Truck Drivers Association te nen Ningani hian Kawnpui leh Buichali inkar siama hnatlan an tum. “Sum leh pai kan thawh khawm ang a, truck thawh pawl te, lung ngaihtuah pawl te kan awm ang a, i hnatlang mai teh ang u kan ti ta ringawt mai,” Mizoram Truck Owners Association hruaitute chuan an ti.