Raltlan kan mikhual hnu ah pawikhawihna a pung: – Home minister

Mizorama raltlan an rawn luh hnu ah pawikhawihna chi hrang hrang zatve velah an inhnamhnawih tih Home minister K Sapdanga chuan a sawi. Zirtawpnia an hnathawh dan thlirleta Police department hotute thutkhawmah Home minister chuan intelligence report atanga a lan danin, Mizoramah nitinin pawikhawihna hrang hrang a thleng tam tial tial a. Pawikhawihna case zatve vel zetah tualchhung buaina avanga Mizorama sahimna zawnga rawn lut te an tel tih a sawi a ni.
“Mizoram hmun hrang hrangah raltlan sulhnu anga ngaih theih tur, dan leh thupek bawhchhiatna, khawtlang boruak ralmuanna tichhe zawnga chetna thleng thin chu zirchiang a, a tihremna tura ruahmanna siam thuai a tul,” a ti.
Khaw hrang hrang atangin an khuaah emaw a bulhnaiah emaw police station/ out post/ beat post/ border out post/ emaw duty post tal pawh dah tura ngenna an dawng reng tih sawiin, District Executive Force tin chu an huamchhungah a khawi emaw ber dah a tulna emaw a remchan dan lo zirchiang a, rawtna thlen turin a chah.
“Dan leh thupek kenkawh kawngah thingtlanga chengten min kohna leh mamawhna hi kan hawisan ngawt thei loa, a theih dan ngaihtuah a ngai a ni,” Home minister hian a ti.
Police department-a thawk, chhan hrang hrang avanga an mawhphurhna hlen chhuak thei lo harsatna nei chu ‘voluntary retirement’ hmanga chawlhtir mai a tul dawn tih sawiin, chumi la ti thei chiah lo pawhin special retirement scheme zawm turin a chah tih a sawi. A hun takah, a hmun takah thawktu mamawh ang an awm theihnan gazetted officer insawnkual kawngah ‘zero based posting’ kalpui a ngai tih a sawi bawk.
Mipui vantlang venghim tura mawhphurhna pawimawh tak chelhtu Police department hna lo thawh tawh dan chu lawmawm a tih thu K Sapdanga hian sawiin, hmasawnna nasa zawk a awm theihnan dan leh thupek kenkawh hna thawktuten taksa leh rilru hrisel nei zel tura an inenkawl that a pawimawh tih a sawi.
Thlirletnaa report danin:
8 Mizorama police station hmasa ber chu kum 1895-a din a ni a; kum 1947-ah police station 6 – Aizawl, Lunglei, Siaha, Kolasib, Champhai leh Tlabungah din phalna hmuh leh a ni.
8 Kum 1973 khan 1st Mizoram Battalion Armed Police din a ni a. Tunah hian Police DEF 11, armed battalion 3, Indian Reserved Bn 5, Police Traning School 1, Traffic Unit 1, Security Unit 1, Intelligent Unit 3 leh MPRO 1 a awm.
8 Mizoram Police hnuaiah sanctioned post 12189 zinga 7685 hnawhkhah a ni a, heng zinga 158 chu gazetted officer niin, un-armed 2409, armed 4424, ministerial staff 179, stenographer 23, computer operator 8 leh MPRO 484 an awm.
8 Tunhnaiah constable 259 lak thar an ni a. Heti chung hian Police department-ah post hnawkhat loh awmzat chu za zelah 38.9 a ni.
8 Tun tum thutkhawmah hian Mizoram Police tihchangtlun leh thawmthatna tura rawtna lut zingah Police Sub Division, Police Station, Police Outpost leh Police Beat Post thar siam rawtna, ramria Border Police Station siam belh tura rawtna leh Border Outpost awmsa thawmthat dan tur sawiho a ni. Police hmunhma hrang hrang thawmthat dan tur leh police-te taksa hriselna vawngtha tura ruahmanna kalpui dan tur sawi a ni bawk.