Govt school-ah common question

Govt school-ah common question
Sawrkar school zawng zawng, Samagra School telin common question neih tir tumin an inbuatsaih mek tih School Education minister Dr Vanlalthlana chuan a sawi.
Federation of Mizoram Samagra Employee (FEMSE) chuan Zirtawpni khan Aizawlah special conference an hmang a. Hmanpuitu Education minister chuan CSS Regularisation Scheme chungchangah harsatna hrang hrang awm mah se, study team-in theihtawp an chhuah tih a sawi a. Sawrkar school zawng zawng, Samagra School telin common question an nei tawh dawn a, inbuatsaihna a kal mek tih a sawi. Text book lei belhnan state sum nuai 150 vel kuminah sen belh a ngai dawn tih a sawi bawk.
Samagra restructuring khawih tum a ni a, office lama file an khawih dan leh staff awm zat atangin zir mek a ni tih a sawi. A tul angin siamrem a ni dawn tih sawiin, zirtirtu quarters 62 sa turin inruahman mek a. School building saknan sawrkar laipui atangin cheng vaibelchhe 200 vel hmuh a ni tih a sawi a ni.
“Danglamna siam turin kan huaisen a ngai a, danglamna siam tumin kan inbuatsaih mek,” Dr Vanlalthlana hian a ti. Mizoram zirna chu siamthat a ngai nasa tih a sawi bawk.
Samagra hnuaia thawkten theihtawp an chhuahna a hmu tih Education minister hian a ti a. Mizoram zirna chawikangtu an nih avangin lawmthu a hrilh a, theihtawpin hma an lak zel tur thu a sawi.