Mt. Everest lawn chhuak ngun record siam
Mt. Everest lawn chhuak ngun record siam
Thla kalta khan Nepali tlanglawnmi, Kami Rita Sherpa chuan a vawi 31 nan khawvela tlang sang ber Mount Everest a lawn chhuak leh ta a, Guinness World Record a lo siam tawh a rawn khum leh ta a ni.
Kami Rita Sherpa hian a vawi khat nan May ni 13, 1994 khan Mt. Everest a lawn chhuak a, chutih lai chuan tlangval kum 24 mi a ni a. Chuta tang chuan kum tin deuthaw a lawn chhuak ta ziah a, kum khata vawi hnih lawn chhuah chang te pawh a nei. Tuna a lawn chhuah hnuhnung berah hian Indian army Seven Summit Treks te guide-ah tangin, a tlang chhim-chhak lam atangin a lawn chhuak.
Tunah chuan Kami Rita pawh kum 55 mi a ni ve tawh a, a hming lemah ‘Everest Man’ te pawh an tih hial khawpa Mt. Everest lawn chhuak ngun a ni a, thlahtu te atanga tlanglawnmi, Everest lawn chhuah tumte lo kaihruai thintu an ni.
Adventurer-te tan Mt. Everest lawn chhuah hi thil chakawm tak, mahse, huphurhawm leh hlauhawm tak, nunna thap a chet chhuah a ni a. He tlang sang bera lawn chhuah hmasa ber chu Sir Edmund Hillary (New Zealand) leh Tenzing Norgay (Nepal) te niin, 1953 khan an lawn chhuak a, chuta tang chuan chawhrualin kumtin mi 12 vel lawn chhuak ziah ang an ni ta a, mahse, tunhnaiah he tlawn lawn chhuak hi an pung chak ta hle a, 2023-ah khan mi 1,200-in lawn chhuah tumin, min 655 an lawn chhuak thei hial a ni.
Sherpa te hi Himalaya tlang bul thut a khawsa an ni a, Nepal, China leh Tibet-ah te an awm a, hmun vawt leh sang a khawsa thang an ni a, tlang lawn pawh thiam tak an ni a, Everest lawn tumte puakphur leh kaihruaituah an tang thin a, Everest leh tourism industry chu an eizawnna pawimawh tak a ni ta a ni.
Hetiang a nihrual hian serpa-te pawhin an eizawnna hlauhawm tak avangin nunna an chan fo tawh a, 2014 khan vur tawlh avangin Nepali serpa 16-in nunna an chan a, hei hi Everest history-ah ni rapthlak ber zinga chhiar tel a ni a, a kumlehah pawh lirnging 7.8 magnitude avanga vur tawlh avangin mi 22-in nunna an chan leh bawk.
New York Times-in an kawmnaah Kami Rita chuan, “Nunna hlut zia hi kan hriat reng a pawimawh. Kan client-te summit (Everest chhip thlenpui) pui hi hlawhtlinna a ni mai lo a, him dam taka hruai kirleh hi a pawimawh ber chu a ni. Client-te leh an chhungte dam taka an intawn leh theih hi kan tan chuan hlawhtlinna ropui ber a ni zawk,” a ti.
Kami Rita chuan an eizawnna chu nunna thap tak tak an nih avangin a fate pawhin a hnung zui lo se a duh tih sawiin, “Tlang lawnah hian inngah reng chiah ka ngai lo. Entirnan, ka tu leh fate pawh tlanglawn te kaihruaitu ni ve turin ka duhsak lo. Nunna thap kan ni a, a kum telin a risk a sang telh telh emaw tih tur a ni lehnghal a, ka fate tan hetiang career hi ka duhsak lo. Tunah chuan thalai zawkte pawhin tlanglawn te kaihruaitu nih hi an tuipui ve lo telh telh tawh,” a ti bawk.