ZPM OB-ten sawrkar hmalakna chhuang

ZPM OB-ten sawrkar hmalakna chhuang
Zoram People’s Movement party hruaitute chuan sawrkar tha zawk siam tuma hmalakna hrang hrangah mumal zawkin sawrkar inrelbawlna a kal chho zel tih a tilang tih sawiin, sawrkar hmalakna chhuanawm an tih thu an sawi.
ZPM Gen. Hqrs office bearers hi Ningani khan Aizawlah an president Lalliansawta kaihhruaiin an thukhawm a. Chak zawka party an kal zel dan tur leh Mizoram sawrkar hmalakna tlangpui an thlirho.
ZPM president chuan hmalam panin an kal zel tih a sawi a. Kalkhawmte chu sawrkar an siam theihna atana fatute, theihtawp chhuaha campaign an ni a, an thawhrimna zawng zawng a thlawn lo tih a sawi. “Kuthnathawktuten a rah an tel a, sawrkar hnathawkin a hunbi ah hlawh an la thei a, ram pumin kan tel mek a, chuvangin in hlu hle a ni,” a ti.
Chief minister Lalduhoma chuan an danglam a tul, tiin, an kal danah fel lo lai leh tha lo lai a awm a nih pawhin, inzir zel tur leh thiam zel tura beisei an ni tih a sawi. Sawrkar hnathawkte nen rim taka thawkin, ram siamtha turin theihtawp an chhuah tih a sawi a ni.
Home minister K Sapdanga chuan, sawrkar hna lakah a thiam leh a titha apiang lak a ni a, transfer & posting pawh uluk taka kalpui a ni tih a sawi.
PWD minister Vanlalhlana chuan, harsatna hrang hrang karah theihtawp chhuahin Mizoram kawngpui tha taka siam tum a ni a, khawpui tawt lutuk tih ziaawm dan pawh ngaihtuah a ni, tiin, kawngpui engemawzat Ministry of Road Transport & Highways kuta a awm chungin, mipui tawrhna tiziaawm turin sawrkarin mawh a la tih a sawi a ni.

ZPM office bearers thukhawm hian resolution an siam:

8 2023 December-a ZPM kaihhruai Mizoram sawrkar thar siam a nih atangin, kan ram leh hnam hmasawnna atana sawrkar hmalakna chhuanawm kan ti a, ZPM Gen. Hqrs chuan a thlawp tlat a ni.
8 Kuthnathawktute thawhrimna hrereng a, ZPM kaihhruai Mizoram sawrkarin a intiam ang ngeia hlawhtling taka thlai thar a lei leh loneituten an kutkawih ngei thawhrim rah an seng thei ta hi kan lawmpui a. Kum lokal zel turah thlai thar lei dan tur ruahmanna tha zawk siam a ni zel hi lawmawm kan ti a ni.
8 ZPM kaihhruai Mizoram sawrkarin mipui hriselna dinhmun ngaihtuah a, an hmakhua ngai taka sum pek lawk ngai lo (cashless) a damlo enkawlna – Mipui Health Care (Mizoram Universal Health Care Scheme – MUHCS) tha tak a duang chhuak leh hman tangkai mek a nih bakah a hlawhtlinna hmel kan hmu zel hi lawmawm kan ti a. Dinhmun harsa zawka dingten sum leh paia harsatna an tawh avanga inenkawlna tha an dawn ve phak loh thinna chu tunah chuan reh chho in, anmahni sum sen ngai lo (cashless) a sawrkarin a enkawl theih tak avanga inenkawlna tha zawk an dawng thei ta hi kan lawmpui a ni.
8 Sawrkar tha zawk siam a nih theihnana hmalakna hrang hrang – aikal lak tihtawp, office hun vawn dik, mumal taka sawrkar hnathawk hlawh leh bill pek chhuah a ni ta leh, sawrkar hna lak hrang hrangah party induhsak bikna awm loa dan anga lak thin a ni ta hi lawmawm kan ti a; hengte hian sawrkar inrelbawlna mumal zawkin a kal chho zel tih a tilang a, dik tak leh tha taka kal zel turin chief minister Pu Lalduhoma kaihhruai Mizoram sawrkar duhsakna kan hlan a ni.
8 Eirukna lakah kan minister leh MLA te vawiin thlenga hminghliau an la awm lo leh India rama eirukna tlem lamah Mizoram pahnihna hial kan ni thei hi lawmawm kan ti a. Eiruk tlem berna state ni thei tura tan lak zel nise kan ti.