Tiau kam khuate ruak titih rih
Tun hnaiah Champhai district depa Myanmar lam an buai a, mi a sang tel an tlanchhe mek. Mipui an tlanchhiat avangin |iau kam khuate a ruak titih rih a, a ruak lo a nih pawhin mi tlem azawng chauh an awm rih tih thu dawn a ni.
Champhai district-a Zokhawthar, Mizoram state khaw tawp ber ral lehlamah Khawmawi a awm a, |iau tiin he khua hi an sawi thin bawk. Zokhawthar leh Khawmawi hi |iau luiin a daidang a ni. Khawmawi hi a ruak a, a mi chengte zingah tlanchhe ve lo tlem azawng tak tak chauh an awm.
Khawmawi naupang engemaw zat chu Zokhawtharah hian sikul an kal thin a, mahse tun hnaiah naupang sikul kal lo pahnih khat, an zirtirtute’n an han ngaihven a, an tlanchhiat ve loh avanga sikul pawh kal rih lo an nih thu an hre chhuak.
Zokhawthar atanga thu dawn danin, Khawmawi hi a ruak tiin a sawi theih a, CNDF mi leh sate bak chu pahnih khat chauh tak tak an awm ang.
Khawmawi leh a chhehvel hi Myanmar sipai sorkar lak atangin 2023 kum tawpah khan sipai sorkar paih tumtute’n an la a, chumi hnu chuan Hualngoram People’s Organisation (HPO)-in an awp zui. Kar hmasa Inrinni-a CNDF nena inkap -Chindland Defence Force (CDF), Hualngoram te kha HPO hnuaia mi an ni. CNDF hian Khawmawi leh e chhehvel khua an awp taah ngaih a ni a, mahse khua hi a ruak titih deuh vek ang, Zokhawthar lam chuan an ti.
Khawmawi bula Haimual khua chu a ruak sa a, sipai sorkar leh sipai sorkar paih tumtute inbeih laia an tlanchhia kha, khuaah an let rih lo. Zokhawthar leh Melbuk inkar velah Haimual khaw mite hi an cheng.
Khawmawi chhak lawka awm Rih khua pawh a ruak titih a, Lianhna pawh a ruak deuh thaw turah ngaih a ni. Rihdil chhaka Khawthlir khua pawh Zokhawtharah an luh nasat avangin Zokhawthar lam chuan a ruak deuh tawh ang ang ti.
Chawlhni khan Leilet khuaah CNDF leh CNA an inkap leh a, hei vang hian a bul hnai vela mite chu Saikhumphai lamah an tlanchhia.
Tun hnaia an buai vanga Mizoram tlanchhiate hi Mizoram Police lam chuan mi 3500 chuang an chhinchhiah thei a, Zokhawthar-ah mi 3524, Saikhumphai-ah mi 720 an lut tiin an chhinchhiah. Saikhumphai leh a bul vela lutte hi hmun khatah an chhinchhiah tih thu dawn a ni a, police-te chhinchhiah hman loh mi a sang tel an awm tura ngaih a nih bakah, police-te hian naupang an chhinchhiah rih lo tih thu dawn a ni bawk.