Yemen-ah a ram mi a thah vangin Indian nurse tihlum dawn

Yemen-ah a ram mi a thah vangin Indian nurse tihlum dawn
Yemeni a thah avanga thi tura tih Indian nurse, Nimisha Priya-i chu Nilaini hian tihhlum a ni dawn a. Nikum khan Yemen president-in thi tura hremna hi kaltlangpui turin a lo ti tawh a ni.
External affairs ministry chuan Kerala-a cheng, Priya-i thubuai hi a tir atanga ngaihvenin tual chhung thuneitute leh a chhungte pawh an bepawp reng a, a tih theih ang apiang an ti tih an sawi.
Priya-i hi kum 2008-a Yemen-a awm tan a ni a. Damdawi in hrang hranga a thawh hnuah kum 2014 khanb clinic a hawng a, Yemen ram dana ram dang mi sumdawng turin a ram mi thawhpui tura a tih avangin Talal Abdo Mahdi-a nen an hawng a ni.
Mahdi-a nen hian inthen zuiin a lakah thubuai a thehlut a, kum 2016 khan man a ni a, chhuah leh thuai niin a tibuai zui reng niin a sawi.
A chhungte chuan a passport a hmansak theih nan Mahdi-a hi nikhaw hriat lohna hmangin a chiu niin an sawi a; mahse, a lo tam lutuk avangin a thi zui ta a. Yemen chhuahsan a tum laiin man a ni a, kum 2018 khan tual a that tih nemngheh a ni.
Trial court chuan Yemeni a that tih pawmin Supreme Judicial Council pawhin November, 2023 khan hetiang bawk hian thu a titlu zui a, thi turin tih a ni zui ta a ni.
Kochi-a mi in tifaia inhlawh thin, Priya-i nu chuan a fanu thubuai khin nan hian an in a hralh niin dan hre mi, Subhash Chandran-a chuan a sawi a. Priya-i chhuah theih nan hian Indian sorkar pawhin beiin pawl hrang hrangte che chhuak mah se an khing let hneh ta chuang lo a ni.