Manipur-ah chhiarpui neih a ni rih dawn lo

Manipur sorkar chuan Union Home Minister Amit Shah-a hova thutkhawm hnuah sorkar laipuiin an state-a chhiarpui neih tur chu a sawn hla tih a puang.
State sorkarin Thawhtanni tlaia thu a chhuahah Shah-a hova thutkhawmah hian Governor Ajay Kumar Bhalla leh Chief Minister Yumnam Khemchand Singh-a bakah sorkar hotu lian dangte an tel tih an tar lang.
“Thutkhawmah hian Manipur mipuiten National Register of Citizens (NRC) hma chu chhiarpui neih loh an duhnate sawiho a ni a, Manipur-a mipuite ngaihtuahna leh duhna te tihhlawhtlinsakin chhiarpui neih tura tih chu sawn hlat ni se tiin thu tihtluk a ni,” an ti.
Union home minister (MHA) erawh chuan hemi chungchangah hian thu a la chhuah lo.
Manipuia Chhiar 2027 (house listing) neih tur hi September 1 atanga September 30 chhunga neih tura tih tawh a ni a; mahse, mi tam takin duh lovin a thawktu turten training an neih pawh an tibuai a. Thuneitute chuan August 17 atanga mahnia inziah luh theihna hawn pawh sawn hlat a ni tawh tih an sawi bawk.
Manipur-ah hian chhiarpui kaihhnawihah duh lohna lian tak tak lantir a ni tawh a. Kuki-Zo ni lote chuan NRC (kum 1951 behchhanin) kalpui hmasak phawt an duh a ni.
Meitei, Naga leh Meitei Panggal vantlang pawl 1 aiawhte chuan politic hruaitu lawkte dawrin chhiarpui neih hma hian an ram chhunga dan lova lutte hriat chhuah nan NRC kalpui hmasak phawt an phut thu an lo thlen tawh a. Heng pawl zingah hian Kuki-Zo aiawh pawl an tel ve lo.
Pawlte hian Myanmar atangin dan lovin mi tam tak an state-ah lutin an inbengbel tih an sawi a, chhiarpui neih nghal mai anih chuan ram chhung mia chhiar niin an nihna dik lo tak a lang dawn tih an sawi a ni.
Pawl aiawhte hian BJP President Nitin Nabin-a leh union minister hrang hrangte pawh hmuin an duh dan tihlawhtling turin an lo nawr tawh bawk.
Thawhtannia thu a chhuahah chief minister pisa chuan pawl 14 hruaitute leh BJP MLA-te, tun hnaia New Delhi-a kala NRC kalpui duha sorkar laipui hotute dawrtute chungah lawm thu a sawi.
“Chief minister chuan sorkar laipuia hotu leh hruaitute dawr fo an nihna chuan vawiina thutlukna hi a hring chhuak tih a sawi a. Bandh leh nawrh huaihawt hian sorkarah thil phut hlawhtlinna a hrilh lo va, hetiang hi chuan mipuite harsatna a siam mai zawk thin a. Chutainga ti lovin mipui aiawh pawlten indawrna leh state chhunga thil thlengte nen thuneitute an thawhpuina chuan thil tha a chhuah zawk a. Sorkar hi mipuite tan a ni a, eng thilah pawh a chhanna tha zawk a awm theih nan sorkar nena indawr zel hi a tha ber a ni,” a ti.