PMJVK hnuaia Tipa leh SiahaaCentre/ Hall sak tur lung phum

PMJVK hnuaia Tipa leh Siahaa
Centre/ Hall sak tur lung phum
Union minister of state for Minority Affairs and Fisheries, Animal Husbandry & Dairying George Kurian chuan Nilaini khan inbiak hmuh theihna hmangin PMJVK hnuaia Siaha district-a project thlan chhuah pahnih hna thawh tanna tur lungphum a phum.
Siaha-ah hian addl DC Abraham Beirazi Khithie kaihhruaiin lo zawm a ni a. Siaha district-a MLA pahnih – Dr K Beichhua leh K Hrahmo bakah state sawrkar leh Mara Autonomous District Council hotute an tel a ni.
Union MoS chuan Prime minister Narendra Modi kaihhruaina hnuaiah India chu kum 2047 ah ‘developed country’ (Vikshik Bharat-2047) a siam tumin hmasawnna hna tam tak thawh a ni tawh a, hmarchhak state leh a bikin Mizoram pawh nasa taka thuam chak niin, ram hmasawnna turin theihtawp chhuah a ni tih a sawi.
Siaha district-ah PMJVK hnuaia thlan chhuah project pahnih – Tipa (Tuipang) ah Market Shed cum Multipurpose Centre leh Women Facilitation Centre bakah Siaha-ah Multipurpose Community Hall chu Mara ram mipui nunphung nen pawh a inrem hle, tiin, tangkai taka hman a nih theihnan duhsakna a hlan tih a sawi a ni.
Siaha bialtu MLA Dr K Beichhua chuan sawrkar laipui chungah lawmthu a sawi a. Sawrkar laipuia sawrkarna fawng vuan mekte chu hnam hnuaihnung zawk (minority) te ngaipawimawh a, an dinchhuah ve theihna tura theihtawp an chhuah thinnaah lawmthu sawiin, hun lo kal zel turah pawh an hmakhua ngai chhunzawm zel turin a ngen.
MADC chief executive member M Laikaw pawhin tuna a lung an phum tak pahnih bakah MADC-in PMJVK hnuaia project a thehluh dang pathum, a vaiin cheng nuai 9000 senna tur pawm a nih avangin lawmthu a sawi a ni.