Indian nurse tihhlum tur tan India-in a tih theih apiang ti

Indian nurse tihhlum tur tan India-in a tih theih apiang ti
Yemen-a Kerala nurse tihhlum tura tih, Nimisha Priya-i chungchangah Indian Ministry of External Affairs (MEA) chuan sorkarin a chhungte hnenah tihhlum a nih lohna turin a tih theih apiang a ti tih a sawi.
Delhi-a Ningani tlaia thuthar lakhawmtute a kawmnaah MEA thupuangtu, Randhir Jaiswal-a chuan, “India sorkar hian a puih theihna apiangah a pui zel a. Dan hmanga beih nan a pui turin dan hre mi ruat a ni a. An buaina tifel tur hian tual chhung thuneitute leh a chhungte pawh kan be reng a. Tun hnaiah pawh lehlam nena inremna an neih theihna turin ni tam zawk an neih theihna tur kan dapsak a ni,” a ti.
“Thil thleng thar apiang kan ngaihvenin he thubuaia puih theihna awm chu kan ti zel dawn a. Kan thian hnai sorkarte pawh hemi chungchangah hian kan bia a ni,” a ti.
Yemen-a thuneitute chuan Nilainia tihhlum tura a ni ruat tawh, Priya-i tihhlum hun tur hi an lo sawn hla tawh.
Indian thuneitute hian a tanna thuneitute leh prosecutor’s office pawh be rengin tihhlum hun sawn a nih theih nan hma an la a ni.
Thawhtanni khan sorkar laipui chuan Supreme Court-ah Priya-i chhan theihna awm chhun chu ‘blood money’ inremna chauh a nih tawh thu a hrilh a, hei hi sum hmanga a mi thah nia sawi chhungte tihlungawi a ni.
Kerala-a Palakkad sidtrict-a Kollengode-a cheng, Priya-i hi kum 2017-a a sumdawnpui, Yemeni Talal Abdo Mahdi a that avangin kum 2020 khan court chuan tihhlum turin a rel a. A chhungte chuan Yemen-a Supreme Judicial Council-ah khing let mah se November, 2023 khan court thutlukna chu kaltlangpui turin a ti ve leh a ni.
Priya-i chhungte hian a mi thah chhungte hnenah hian ngaihdam dil leh a him theih nan Rs vaibelchhe 8.6 pek an tum nia sawi a ni.
“Islam danah mi thah hian a thattu hian a mi that chhungte hnena Diya (zangnadawmna) pek hi an tih thin dan a ni a. A mi that chhungte hnenah hian Diya pek tur hi ka thlen tawh a, an pawm dawn nge dawn lo an la sawiho dawn a ni,” tiin Yemen-a Priya-i buaipuitu, Sheikh Kanthapuram AP Aboobacker Musliyar, Grand Mufti of India chuan ANI hnenah a sawi.
Priya-i tihhlum hun tur sawn a ni hi a chhungte chuan a mi thah chhungte dawrna hun remchangah hmangin a nunna chhan tumin an la bei chhunzawm zel a ni.