Gandhi-a thu sawi vangin mi thi – Assam CM

Gandhi-a thu sawi vangin mi thi – Assam CM
Assam Chief Minister Himanta Biswa Sarma chuan Congress hruaitu, Rahul Gandhi-a’n dan lova sorkar ram luahtute a fuiha venhim hna thawktute bei tura a fuih avangin police-in Goalpara-ah dan lova ram luahtute an kahnaah mi pakhat a thih phah niin Ningani khan a sawi.
Sarma hian Ningania Paikan reserve forest-a thil thleng chungchang a sawinaah a hma ni chiaha Gandhi-a’n Assam tlawha a thil sawiah dan lova khawsate fuihin abn state-a mite nunna tiderthawngin muanna a tichhia niin a sawi.
“Rahul Gandhi-a’n Assam lo tlawhin ramngaw luah turin mite a tiphur a ni,” tiin Sarma hian a hma nia Lok Sabha Leader of Opposition-in an state tlawha thu a sawi chungchang a sawi chhuak.
Congress President Mallikarjun Kharge-a nen Gandhi-a hian Assam hi tlawhin Guwahati-ah state chhunga an party hruaitute nen an inkawm a, km 40 vela hla, Chaygaon-ah an party mite nen inkhawmah thu a sawi bawk.
A thu sawinaah Assam-ah hian ramte chu mipuite hnen atanga chhuhsakin industrialist hausa tak takte hnenah pek a ni thin niin a sawi.
“A thu sawi dik lo tak avang hian vawiin khan kan police leh forest miten Paikan Reserve Forest-a dan lova khawsate um chhuah tumte chu mipuiin tharumin an lo bei let a. An hna an thawhnaah police officer leh forest guard huaisen tak tak 21-in hliam an tuar a ni,” tiin Sarma chuan X-ah a tar lang.
Duhthlan tur dang an neih loh avangin boruak tihdaih nan police hian loh theih lohvin silai an hmet puak a, dan lova sorkar hmuna awm pakhat a thih phah niin a tar lang bawk.
“Hei hi Rahul Gandhi-a’n ni khat Assam a tlawh chhunga a thil hnutchhiah chu a ni a. A thu sawi dan rawva tak avang hian kan state-a mite nunna leh muanna a tichhia a. Assam mipuiten kan theihnghiolh dawn lo a ni,” tiin chief minister hian a tar lang bawk.
Mi pakhat thi bakah hian police telin mi eng emaw zatin Goalpara district-a Paikan Reserve Forest-a Ningania innawrna thlengah hian hliam an tuar.
Goalpara District Commissioner Prodip Timung chuan Inrinna phal lohna hmuna chengte hnawh chhuah hna an thawh hnuah forest guard leh police-te hi ram luahtute hian tiang leh lungin an lo tawng niin a sawi.
Police hian boruak thunun nan silai an hmet puak a, a lo tibuaitu zinga mi pakhat thiin mi dang pahnihin hliam an tuar niin a sawi a. Lunga an lo vawmna avangin police leh forest guard eng emaw zatin hliam an tuar bawk niin DC chuan a sawi.