Mizoram Junior team an chak awlsam
India ram chhunga kum bithliah inelna ngaihhlut hlawh Junior Boys National Football Championship For Dr BC Roy Trophy 2025-26-ah Thawhtan zing khan Mizoram team in an match hmasa ber an khel a, an khingpui Chandigarh chu 10-0 ngawtin an sawp. Chandigarh sawptu Mizoram hian Chhatisgarh an hmachhawn zui leh dawn.
Anritsar, Punjab-ah inelna neih mekah Mizoram hi Group D-ah an awm a, Thawhtan zing khan an match hmasa ber an khel. An match hmasa berah duhthusama thain a khel a, chawlhlawk hma leh chawlhlawk hnuin goal nga ve ve an thun. An khingpuite an nawr beh reng hnuin Mizoram tan hian R Lalremruata chuan minute 22-naah hmahruaina goal a thun. Hmahruaina goal an thun atanga minute khat hnu lekah Joel Lalawmpuia chuan an goal hnihna a thun zui leh zat bawk. Inhnaih chilh taka goal hnih an thun vangin Mizoram an phur a, inrintawkna sang zawk nena inlanin inkhel hmuhnawm an lantir.
Inhnaih chilh taka goal hnih an thun hnuin Mizoram hian a khat mawi tawkin goal an thun zui a ni ta ber mai. Minute 27-naah Omega Lalawmpuia Ralte chuan an goal thumna thunin an hmahruaina a tizau. Ngam taka an khingpuite nawr zui zelin minute 38-naah midfielder Lalrempuia chuan mawi leh fuh zetin minute 38-naah an goal lina a thun a. Rempuia goal thun atanga minute hnih hnu lekah Malsawmdawngkima chuan an goal ngana a thun zui leh zat a, 5-0 ngawta hmahruaia chungin chawlhlawk an hmang.
Chawlhlawk hnu lamah Mizoram an khel tha chhunzawm a, goal an thun belh leh thuai. Goal hmahruai thuntu R Lalremruata chuan minute 47-naah an goal rukna a thun a. Minute 55-naah Enok Lalchelzing-a’n an goal sarihna a htun hnuin Zoramdinthara chuan goal hnih a thun zawn leh a. Goal khat thun tawh Enok-a’n a tawp kharin minute 74-naah an goal 10-na a thun a, Chandigarh lakah 10-0 ngawtin hnehna an chang a, awlsam takin point thum an hmu.
Junior Boys National Football Championship For Dr BC Roy Trophy 2025-26-ah Mizoram hi Group D-ah Chandigarh, Chatisgarth leh Maharashtra te nen an awm tlang a, nilai zing dar 8:30-ah Chatisgarth hmachhawnin an match hnihna an khel ang.