GANC hmunhma zauhtheih dan a hmunah enho

GANC hmunhma zauh
theih dan a hmunah enho
Govt. Aizawl North College leh a thenawm ram leh building tlawhin Thawhlehni zing khan Higher & Technical Education minister Dr Vanlalthlana, Commerce & Industries minister F Rodingliana leh PHE minister Prof. Lalnilawma ten a hmunah an enfiah a. A kaihhnawih department hotuten an tawiawm.
Govt. Aizawl North College (GANC) hian zirlai an ngah avangin an thenawm hmar lama Commerce & Industries bazar hmun an luah then a. College hmunhma in zirlai a dawl zawh tawh loh avangin harsatna an tawk. Hemi chingfel tur hian July 16 khan joint meeting neih a ni a. Thutlukna fel zawk siam a nih theihnan a hmuna enfiah a ni.
Commerce & Industries building ram hi college atana luah a nih chuan Ramhlun North bazar hmunhma tur ruahman a ngai dawn a. Bazar building thenawma sawrkar building chu MINECO-a office building sa mek, Aizawl District Local Administration office leh office hawn thar Aizawl North Revenue office atan luah a ni. Bazar building nen a inkarah hian MIZOFED building a tla zep a. Heng building chhak lam hi SCERT ram niin, DIET principal quarters bakah staff quarters pakhat awmin, a thenawm chhim lamah PHE site office a awm. Heng lai rama sawrkar building awmte hman dan turah hian ruahmanna kalpui dan ngaihtuah a ni a. Ram leh building hi sawrkar department hrang hrang ta a nih avangin joint meeting hmanga hma lak zel dan tur sawiho a ni.