Ram 28-in Gaza indo titawp turin ti, Israel chet dan dem

Ram 28-in Gaza indo titawp turin ti, Israel chet dan dem
Ram 28-in Gaza-a indona chu rang taka titawp tura tiin civil mite tawrhna chuan ‘a thuk zawngin rahbi dang’ a kai leh tawh niin an sawi.
Thuchhuah intawm an siamah Israel-in mi puihna thil an sem dan chu a hlauhawm lutuk nia sawiin an dem a, ei tur leh tui dawn tumte chu ‘drip hmanga inpek ang mai niin civil mite chu mihring tih dan phung lo taka thah an ni’ tih an sawi.
Gaza-a Hamas enkawl health ministry chuan kartawpah khan ei tur dawn tum Palestinian 100 chuang Israeli-te silai hmeh puahah an thi leh a, mi dang 19 pawh ei tur kham hmuh loh vangin an thi bawk niin an sawi.
Israeli foreign ministry erawh chuan heng ramte thuchhuah hi hnawlin ‘a tak tak pawh lo leh Hamas hnena thuchah dik lo thawntu’ tiin an sawi.
Ministry hian hel pawl hi inkahhai thar puan leh an mi hren chhuah tura inremna hnawla thu dik lo thehdarh leh puihna sem pawh remchanga hman tumah an puh.
Hamas nena thla 21 indo tawh chhunga Gaza-a Israel-in chet dan hi ram tam takin an dem thu an sawi tawh thin a; mahse, engmah rah tha a chhuah lo.
Tuna demtu ram 28 zingah hian UK, Australia, Canada, France, Italy, Japan, New Zealand leh Switzerland te pawh an tel a. An thuchhuah hi ‘Gaza-a indona hi a tawp nghal tur a ni’ tiin an tan.
“Gaza-a civil mite tawrhna hian a thuk lamah rahbi a kai thar leh ta a. Israeli sorkarin puihna a pek dan hi a hlauhawm lutuk a, tuialhthei an inchan lo va, Gazan mangang tak takte hi mihring an nihna angin enkawl an ni lo,” an ti.
“Puihna pek tlem lutuk leh naupangte tela an mamawh em em tui leh chaw dawn tumte mihring tih dan lo taka inthahna hi kan dem a. Puihna dawn tum Palestinian 800 chuang rawng taka thah an ni tawh,” an ti.
Israel hian chawlhkar 11 chhung Gaza luhna a dan chah hnuah May khan tlem hawngin US nena ruahmanna siamin puihna an pek luhte chu UN-in sem tawh lovin anmahni din, Gaza Humanitarian Foundation (GHF)-in an sem a. Ni tin deuhthaw puihna dawn tuma kal Palestinian thahna hi a thleng reng.
Israel chuan an sipaite awmna hnaiha GHF-in an sem dan chu Hamas-in an thil pek luhte an ruk loh nana an tih niin an sawi a. UN leh an thawhpuiute erawh chuan a him lo va, mihring laka thil tih dan phung palzutna niin an sawi thung.
Kar hmasa Thawhlehni khan UN human rights office chuan chawlhkar riat liam ta atanga GHF-in thil an sem atangin an semna hmunah mi 674 thah an ni tawh tih a sawi a. Mi 201 dang chu UN hmun pan leh puihna phurte kal velna bula thah an ni bawk tih an sawi.
World Food Programme chuan Gaza-a tam tamna hian ‘manganna rapthlak thar’ a thlen nia sawiin puina an dawn that loh avangin mi an thi a, naupang leh hmeichhia 90,000 chuang enkawl vat vat ngai an awm niin a sawi.
Ra, 28-te hian Israel-in Gaza-a cheng mi maktaduai 2.1-te chhim lama Rafah-a ‘humanitarian city’ an tiha dah khawm a tum chu an duh lo bawk.
Israel, Hamas leh ram dangte chu ‘buaina titawp tur leh a rang thei ang bera intiamkamna awm lova inkahhai nghet’ puang turin an nawr bawk.
Israeli sipaite hian October 7, 2023-a Hamas-in an ram beia mi 1,200 chuang an thah leh hren tura mi 251 an hruai phuba lak nan Gaza hi beiin tun thlengin mi 59,029 an thi tawh niin Hamas health ministry chuan a sawi.