Liverpool in Ekitike la lut

Last updated Jul 25, 2025 6 0
Chiang lo zawng zawng a chiang ta a, zawhna awm zawng zawng pawh chhan fel niin English Premier League champion Liverpool chuan striker Hugo Ekitike an la lut fel ta.
Liverpool hian Eintracht Frankfurt atanga Hugo Ekitike lak nan £69m an thehchhuak phawt a, an hnena a khelh that dan a zirin German club hnenah £10m an pek belh leh ang. Kum 23 mi hian medical test a paltlang fel tawh a, mimal iremna pawh nei fel tawh bawkin Asia lama zinchhuak mek a club thar zawk turin a thlawkchhuak zui nghal dawn bawk.
Season liam taah Frankfurt tan vawi 31 bul tan a, goal 15 thun a assist vawi riat nei bawk Ekitike hi Newcastle United chuan  £70m senga lak tumin an dawr, German club in an hnar. Liverpool in season liam taa chetha tak Alexander Isak lak tuma an ngaihven vanga Ekitike hi lak tuma ngaihven an ni. Reds in Isak an ngaihven chhunzawm loh vangin Newcastle United pawh an ngawi zui ve leh mai bawk. Amah Ekitike hi chuan French champion Paris St-Germain zawm a duh ber thung. PSG hian tlarhma an neih that vangin Ekitike hi an ngaihvben lo ve tlat thung lawi. PSG in an ngaihven loh vangin EPL champion Liverpool in an lak theih phah ta thung.
Tarlan tawh angin Hugo Ekitike hi season liam ta khan Eintracht Frankfurt tan a chetha viau a, Manchester City in an lak tak Omar Marmoush nen khan an inkawp fuh viau. Omar Marmoush a chhuah hnuin Ekitike hi a khingbai deuh ta tlat thung. Club lian leh ropui zawk Liverpool-ah player tha zawkte kiangah a khel dawn a, EPL tihmuhnawm leh zualtu zingah a tel ngei a beiseiawm.
English club ropui ber Liverpool hi nipui bazar inhawng mekah an chetha hle a, sum pawh an seng hnem a, £250m zet an seng der tawh. Ekitike an lak luh hma hian midfielder hmuhnawm tak Florian Wirtz chu £116m chu zet sengin an la lut a. Real Madrid pana chhuak ta Trent Alexander-Arnold hmunruak luahtu atan defenders Milos Kerkez leh Jeremie Frimpong te £70m sengin an la lut tawh bawk. Reds hian EPL-ah champion nawn leh ngei an tum dawn a, Champions League-ah champion tumin an bei nasa hle ngei dawn bawk. An intuam thar nasa bawk a, an hlauhawm leh zual hle ngei dawn a ni.