Tsitsipas leh coach Ivanisevic an inthen

Last updated Jul 25, 2025 4 0
Tennis star hriat hlawh Stefanos Tsitsipas leh a coach Goran Ivanisevic te chuan an thawhdunna an titawp a, an inthen.
Greek star Tsitsipas leh a coach Goran Ivanisevic te hi May thla atang khan an thawk dun. Grand Slam a hmachhawn hnuhnung pali-ah vawi hnih chiah Tsitsipas hian hnehna a chang a, a khelh that loh em vangin Novak Djokovic-a coach hlui Ivanisevic hi a coach atan a ruai. Wimbledon khel tura an inbuatsaih laiin thimrim takin an inhnial. Coach Ivanisevic hian Tsitsipas hi fitness chhe lutuk tiin pawn lamah a sawisel zauh a, hei hi an inhmuhthiam loh bul tanna a ni.
Player langsar pawl tak ni a, Grand Slam final pawh lo hmachhawn tawh Tsitsipas hian Grand Slam ngaihhluthlawh ber Wimbledon-ah beisei a phak lo zui ta reng a, first round a paltlang zo lo. First round-ah hian Valentin Royer a hmachhawn a, set hniha a hnufual laiin hliamin a tibuai a, a khel zui thei lo. Wimbledon-ah beisei a phak lova, Grass season-ah vawi hnih chauh hnehna a chan vangin caoch laka a beiseina a tlahniam duai a, an inban zui ta a ni.
Tsitsipas nena inthen ta Ivanisevic hi Wimbledon champion hlui a ni a, Tennis player ropui ber Novak Djokovic nen kum ruk ngawt an lo thawk dun tawh nghe nghe a. Wimbledon champion Elena Rybakina nen an lo thawk dun tawh bawk. Player thinchhe ve tak Tsitsipas hi World No. 29 a ni mek a, French Open khelh zawh hnu khan inelna lianah second round a la lut leh ta miah lo a ni.