‘Saiyaara’-in ni 6 chhungin Hindi film sum la lut tam 62-na ni hman

Bollywood-a mithar ve ve, Ahaan Panday leh Aneet Padda te channa, romatic drama ‘Saiyaara’ chuan ni 6 chhungin Hindi tawng hmang film tlangzarh tawh zawng zawnga sum la lut tam 62-na a kai hman.
‘Saiyaara’ hi Zirtawpni kalta a tlangzarh kha niin, Nilaini thleng khan India-ah cinema hall ticket hralhna atangin cheng vaibelchhe 153.23 a la lut tling tawh a, Bollywood film hriat hlawh tak tak Shah Rukh Khan channa ‘Dilwale’ (vbc 148.42), Salman Khan channa ‘Bodyguard’ (vbc 148.52) leh ‘Salaar: Cease Fire – Part 1’ (vbc 152.65) te pawh a sum lak luh tamah a lehpel hman.
‘Saiyaara’ hi hetiang khawpa sum la lut chak turin tuman an ring lawk lo va, a changtute lah Bollywood a hming thar ve ve, fan base la nei miah lo ve ve an ni lehnghal a, a film siam nana an sum sen pawh tunlai Bollywood film-ah chuan a tlem pawl tak a la ni zui.
Tun weekend lo awm turah hian Bollywood-ah film thar tlangzarh tur boruak han nei deuh a awm lo lehnghal a, hei vang hian tun weekend chhung hian Saiyaara sum lak luh hi vaibelchhe 200 pel hman tura chhut a ni a, Hindi tawng hmanna film tlangzarh tawh zinga sum la lut tam top 50-ah chuan a awm hman ngei tawhin a rinawm.
‘Saiyaara’ hian opening weekend (kar kalta Zirtawpni – Pathianni)ah India-ah cinema hall ticket hralhna atangin cheng vaibelchhe 83.25 la lut theiin, Hindi love story film-a opening weekend-a sum la lut tam ber record a lo siam tawh bawk a ni.