Mamit district kawng siamna atanasum dah CM car thar man aia tlem
Mamit district kawng siamna atana
sum dah CM car thar man aia tlem
Mamit district Darlak leh Tuidam inkar kawng siamna atana sawrkarin sum a dah chu chief minister car thar man ai pawha tlem a ni tih Congress hruaitu PC Laltlansanga chuan a sawi.
July 26-a Congress Bhavan inkhawma thu sawitu MPCC general secretary PC Laltlansanga chuan, Darlak leh Tuidam inkar kawng a chhe em em a, a siamnan cheng nuai 20 chauh sawrkarin a dah tih sawiin, “Chief minister chu motor changkangah a chuang ve dawn lo, titu CM motor nuai 30 man aiin Mamit district Darlak kawng siamna tur a tlem zawk a, Mamit district khuan kan CM motor thar man pawh an tluk lo a nih chu,” a ti.
Congress sawrkar hnuhnung zawkah kum thum (2015- 2017) chhung a zawnin ruahtui mililitre 2000 chuang a tla ziah a, kum 2017 phei chu state nih hnua Mizoram-in ruahtui a dawn tam ber kum niin, khati taka a zawna ruahtui a tam avang khan kawng siamna hun tha a tlem a, kawngpui siamna tur bik liau liau in kum 2018 PWD budget Roads & Highway head-ah nuai 20632.74 Congress sawrkar khan dahin a tlaksan tih a sawi a ni.
“Congress sawrkar lai khan ruahtui a tam bakah Aizawl to Champhai, Aizawl to Tuipang, Aizawl to Kanhmun hi contractor-ten hna an tan tawh a. Lei laih (formation cutting) avangin kawng a diak em em a. Vawiina kawng tha tak kan neih takte hi khatihlai kha a diak vanglai a ni. Sawrkar inthlahdah vanga kawng kha chhia a ni loa, kawng tha tur siam vang a ni,” a ti.
Vawiina Kawnpui leh Sairang inkar kawng NH-06 chu nikum furah a chhe em em tawh a, lirthei tam tak an tlu a. Mizoram comercial vehicle neitute leh driver-ten nawrh an huaihawt a, chumi tum chuan chief minister-in, hna an tan nghal dawn a, Satguru security deposit pawh an laksak tawh, tiin nawrh huaihawttute a hrilh a. 2024 September atangin NH 06 km 118 Kawnpui to km 133 New Khamrang inkar Mizoram PWD kutah a awm a. NHDCIL-in Mizoram sawrkar kut atangin kumin July 7 khan an la chhawng chauh a, thal khaw tha thla 9 chhung PWD kutah a awm avangin helai kawng chhiat avanga harsatna kan tawh mek hi sawrkar mawh liau liau a ni, tiin PC Laltlansanga hian a sawi.