Covid-19 vei zat pung leh mek

reh vang vang hnuah tun hnaiah a rawn inlar leh a, Covid-19 hri vei an awm thu hriat tur a awm leh ta fo mai. Tun thlaah hri vei zat a pung leh mek a, amaherawhchu, han chi-aina tur erawh a awm lovah ngaih a ni.
August thlaah hri vei hriat thar an awm deuh mawlh mawlh a, Nilaini pawh khan mi paliin an vei tih hriatchhuah a ni. Tihian tun thlaah, ni 12 thlengin mi 18-in hri an vei tawh.
IDSP te’n an chhinchhiah danin, June leh July-ah khan Mizoramah hri vei an awm lo a, May ni 26 hnuah hri vei hriatchhuah thar an awm ta lo – ni 69 chhung hri vei hriatchhuah an awm lo a, August ni 4-ah hriatchhuah thar an awm leh ta a ni. Chumi hnuah chuan hriatchhuah an awm zui zeuh zeuh a, ni 4 atanga ni 12 chhungin mi 18 an awm.
Thuneitu lam atanga thu dawn danin, hri vei hriatchhuah tharte hi Aizawl district mi vek an ni a, natna dang vanga inenkawl sa an ni tlangpui. District danga mi pawh ni se Aizawla inenkawl, Covid-19 an vei tih pawh Aizawl district-a hriatchhuah a nih avangin Aizawl district mi anga chhinchhiah zel an ni.
Natna dang vanga inenkawl lai, fimkhur thua endik an ni a, Covid-19 bikah chuan na tak an awm lo a, he hri laka an fihlim hnu pawha natna dang vanga enkawl zui te chu an awm tih thu dawn a ni.
IDSP-in an chhinchhiah danin, tun thla bikah hri vei zinga upa ber chu kum 68 a ni a, a naupang lamah nausen thla khat mi an awm. Tun thlaa hriatchhuah mi 18-te hi mipa pariat leh hmeichhia 10 an ni. Kuminah mi 118-in hri an vei tawh a, hmeichhia 60 leh mipa 58 an ni.