Maldives hnenah Modi-a’n $ mtd 565 a puktir dawn

Maldives hnenah Modi-a’n $ mtd 565 a puktir dawn
Indian Prime Minister Narendra Modi-a chuan Indian Ocean-a thliarkar awm khawm ram, Maldives a tlawhnaah $ maktaduai 565 a puktir tur thu leh zalen taka an insumdawn tawnna tur a puang.
Modi-a hian Zirtawpni leh Inrinni khan he ram hi tlawhin China huhang na mek karah India-in hmasawnna tura Maldives a kawmngeih zel theihna turin hma a la.
Indian prime minister hian pawisa a puktir tur hi hemi atana a tum bulpui ber pakhat a ni tih a sawi.
“Heng sum hmang hian Maldivian mipuiten an ngaih pawimawh hmasawnna ruhrel din a ni dawn a ni,” a ti a. Ram pahnihte hian investment-a inremna an tifel hnai tih as awi bawk.
Tun hi nikuma a vawi thum nana a tlin leh hnua Modi-a’n Maldives a tlawh vawi khatna a ni a, India chu mihring 5,25,000 vel chenna thliarkar ram ngaihventu hmasa ber a nih zel thin thu a sawi.
“India hi Maldives-in ram venhimna kawnga hma a laknaah a thlawptu a ni zel ang,” a ti.
“Muanna, ngialnghehna leh than zelna hi Indian Ocean huam chhunga kan pahniha tum dun a ni,” a ti.
Kum 2023 inthlana President Mohamed Muizzu-a a tlin hnu atang khan India duh lo deuh zawnga chea China lam a awn deuh avangin India leh Maldives inkar hi a lo zau hman hle tawh a, tun hnaiah erawh an inhnaih leh hret hret.
Muizzu-a hi a tlin hlim khan an ram president hmasaten tlawh hmasaka India an neih thin chu bawhchhiain China a tlawh hmasa zawk a ni.
An ram chhunga Indian sipai tlem awm, mi zawn leh chhanchhuah hna thawh nana chhawp helicopter pahnih leh reconnaissance aircraft an dah enkawltute pawh chhuak turin a ti a ni.
Muizzu-a chet dan avang hian New Delhi a chhe hman hle a. A hma kha chuan India hian an rama vaukama vut var leh chawlh hmanna hmun nuam tak tak an neih avanga khualzin tlawhtu ngah tak ram sum leh pai tluchhe mai tur dan nan $ tluklehdingawn 7.5 a lo puktir tawh a ni.
A hnuah Muizzu-a hian India tlawhin India do zawnga a chetna pawh a titawp zui a. Nikum khan Modi-a pawh New Delhi-ah vawi hnih hmuin hruaitu pahnihte hian an inkungkaihna chu ‘bung thar’ tan leh an tiam ve ve nghe nghe.
Zirtawpnia India-in pawisa a puktir tur puan hi Muizzu-a chuan Maldives-a venhim hna thawktute thuam chakna atan bakah damdawi in, chenna leh zirna tihhmasawnna tur a nih thu a sawi.
“India hian Maldives-ah hian ni tin mamawh hrang hrang thawn chhuak rengin hei hi kan pahnih inkar thawh dunna tinghettu ber pawh a ni,” a ti.
Modi-a hi Inrinni khan Male khawpuia Maldives Independence Day vawi 60-na lawmnaah khual zahawm a ni.
Indian prime minister hian Inrinni vek khan India puihnaa thawh, Hanimaadhoo thliarkara international airport zauh fel tawh chu a hawng bawk.