Montreal-a bul tan fuh Raducanu

Montreal-a bul tan fuh Raducanu
US Open atana inbuatsaihna tournament kal mekah British number one Emma Raducanu chuan North America lama a chetthat chhunzawmin Montreal khawpuia Canadian Open-ah hnehnain bul a tan a, first round-a a tumpui leh a thian tha tak ni bawk Elena-Gabriela Ruse lakah 6-2 6-4 hnehna a chang.
Rin loh taka kum 2021-a a champion nawlh tawhna New York Grand Slam tournament hi kuminah August ni 24 atanga September ni 7 chhungin Flushing Mewdows-ah an khel leh dawn a, tah hian a inlan thei a nih chuan kum 2022 hnu lama kum khat chhunga Grand Slam tournament pali a khelh kim vek awmchhun a ni ang.
Emma Raducanu is on cour
Karliamta mai pawh khan Briton hian North America lamah tho Washington Open semi-final a thleng a; inrintawkna chhah tha fu nen Canada lam hi pan zui leh thei tura ngaih niin, Romanian nula a hneh hnuah 32nd seed American Peyton Stearns nen second round-ah an intum zui leh ang.
Kum 22-a upa Raducanu hian hard court lama a chimchin pangngai kha a rawn luah chho leh mek tih a hmuh theih a; first round a paltlang hnuah a tumpui Elena chu a thian th atak a nih avangin mahni hriatchian tak player nena inkhelh chu a harsa tih a sawi a, hnehna a chan avanga a lawm thu leh first round hnehna kha karliamta DC lama a lo thlensan tawhna thlawptu tha a nih thu a tarlang tel.
Briton hian nikum Auckland tournament-ah pawh Ruse hi a lo hneh tawh bawk a ni.
July thla Wimbledon-a Aryna Sabalenka a hneh loh hnu khan Raducanu hi khelmualah khawng angreng takin a kirleh mek a, major title a lakna khelmual awmchhun hard court-a game nga a khelh tawhah vawi li a chak tling tawh a ni.
Montreal tournament kal mek round hnihnaa Stearns a paltlang leh theih chuan third round lamah player khawng zawk tura ngaih American fifth seed leh 2025 Wimbledon finalist ni bawk Amanda Anisimova lakah fiahna hautak lehzual a hmachhawn thei ang.
Hnehna nena Raducanu bultanna kan thlirliam laiin a chipui Briton Katie Boulter erawh 6-1 7-5-in Mexico player Renata Zarazua lakah a tlawm thung.
Hetih lai hian tournament khelhna Canada rama an hmeichhe player hriat hlawh Eugenie Bouchard chuan Thawhtanni vek khan IGA Stadium-a a tumpui Colombia nula Emiliana Arango lakah 6-4, 2-6, 6-2 hnehna a chang a, world number five hlui hi an ram tournament a khelh zawh ruala tennis chawlhsan ve tawh tum a nih avangin he first round hnehna hian a chawlh hun tur a sawnhla leh phawt rih a ni.
Hometown hero Bouchard hian tun thlatir lam khan he tournament kal mek zawh ruala tennis inelna bansan ve tawh a tum thu a puang a, khati a nih bawk avangin tuntuma a inkhel khan ngaihven a hlawh a, amah tantute thawm pawh a nasat zual phah niin a lang.
Hnehna a chan hnu on-court interview-ah, “He tournament-a ka champion a nih chuan ka retire leh rih lo ang,” a han tite chuan lawm a hlawh ngang mai!
Four-time Grand Slam winner Naomi Osaka of Japan pawhin Canadian qualifier Ariana Arseneault laka 6-4, 6-2 hnehna changin, second-round lamah 13th seed Liudmila Samsonova of Russia a hmachhawn leh ang.
Toronto lama khelh men’s tournament-ah Australian Adam Walton chuan set hmasaber hloh zet chungin Frenchman Benjamin Bonzi lakah 4-6, 6-0, 6-3 hnehna a changlet a, second round match pakhatah top seed Alexander Zverev of Germany a su dawn.
He tournament-a kum 2022 champion Spaniard Pablo Carreno Busta pawhin set khatna bawk hloh chungin Liam Draxl lakah 2-6, 6-4, 6-4 hnehna a sualchhuak.
Masters leh WTA 1000 tournament kal mekah hian top player an inhnukdawk nual a, an zingah hian world number one ve ve Aryna Sabalenka leh Jannik Sinner-te bakah Carlos Alcaraz, Novak Djokovic leh Jack Draper an tel.