Phaituala futsal khel tur Thlangtiang Futsal Club
Phaituala futsal khel tur Thlangtiang Futsal Club
MFA Futsal League 2024 champion Thlangtiang FC, Luangmual chuan Mizoram aiawhin National Championship an khel dawn a, vawiin, Thawhtanni hian tournament khelhna tur Rudrapur, Uttarakhand an pan ang.
Inrinni khan phaituala futsal inelna hmachhawn tur team fuihna leh jersey tlangzarhna hun HYVE Aizawl City Hall-ah hman a ni.
He hun hi MFA finance secretary leh MFA Futsal Committee chairman ni bawk LV Lalthantluanga’n a hmanpui a; club president Benjamin Vanlalpeka leh head coach Thomas Lalengkimate’n thu sawiin, sum leh paiah harsatna nei mah se theihtawp chhuaha north east atanga champion hmasa ber nih an tum thu an tarlang.
Thantluanga’n player-te fuihna thu sawiin, football leh futsal atan state association leh AIFF hmalaknate hrilhfiahin, harsatna karah pawh hmalak chhoh zel mek a nih thu a sawi a; player-te chu discipline vawng tha tur leh association leh club hruaitute hmalakna zaha thuawih taka awm turin a chah a, Mizoram hmel pholang tur an ni tih hre renga theihtawp chhuah turin a chah bakah Mizoram tana champion nomawi chawi ngei turin duhsakna a hlan bawk.
Thlangtiang FC Luangmualte chuan MFA 2025-26 season atana an main sponsor tur ARDECO Construction-te chungah lawmthu an sawi.
National competition an tel theihna’na thahnemngai taka hma laksaktu sports minister Lalnghinglova Hmar chungah lawmthu an sawi a; national zinna senso chhawk turin LESDE Department leh Mizoram State Sports Council-te tanpuinaah lawmthu an sawi bawk.
Vamos Sportswear-te’n hun chep tak karah official jersey leh club official-te T-Shirt an sponsor theih hlauh bawk a, an lawm hle a ni.
Thlangtiang FC-te hi Pool B-ah awmin, nikum national champion Corbett FC, finalist Golazo Football Club leh Bhawanipore FC-te nen an awmho a ni.
An match hmasa ber hi champion lai Corbett FC-te nen Ningani zan dar 7:30-ah an khel ang.
Mizoram atanga tel tur awmchhun an ni tih hriatpui a, donation emaw sponsorship anga tanpui turin sports ngaina mite an sawm a ni.