Lawngtlai/Siaha panna kawng ber leimin vangin la buai reng

Lawngtlai/Siaha panna kawng
ber leimin vangin la buai reng
Kar khat chuang leimin a tihbuai tawh Lunglei district atanga Lawngtlai/ Siaha district panna pui ber chu August 10 – Pathianni thleng khan leimin hian a la tibuai a, kawng hi tih tlang ni thin mah se, lei a tawlh zel avangin tun thlengin lirthei tangkhang an la awm.
August 2 chawhnu khan Lunglei district-a Bualte leh Thualthu inkarah leimin a awm a, helai kawng laitu contractor lam chuan titlang nghal mah se, a min lehzel a ni. Ruah a tlak reng bakah lei chet dan hi a muala tawlh thla a nih avangin thenfai zawh hleihtheih a ni loa, thenfai a nih chhungin lirthei kaltlang tir a ni thin a, lei a tlak belh leh thin avangin khar a ngai leh nghal zel a ni.
Lunglei district bawrhsap chuan helai kawng hi khar rih mai tura ti chungin, a hmuna thenfai hna thawh danah remchan zawkna avangin kawng tih tlang lai chuan lirthei hi tlantir thin a ni a, lei tlak dan azirin kea kalin lirthei inbanlek thin a ni a. District thuneitute hian police duty tirin khawtlang hruaitute nen mihring inban lek tawh lo turin a ti a. Lawngtlai/ Siaha lam pan ngei ngei bik chu Sangau kawnga kal turin a ti.
Lirthei tangkhang an awm reng avang hian Bualte leh Thualthu khawtlang hian mikhual engemawzat tan ei leh in tur bakah riahna tur thlenga an buaipui chang a awm a. Mikhual buaipuina atan hian Lunglei South bialtu MLA Lalramliana’n sumfai a pek bakah District Disaster Management Authority Lunglei leh Lawngtlai West bialtu MLA C Ngunlianchunga pawhin heng khaw pahnih tan hian YMA branch hnenah sumfai a hlan a. Khualzin tangkhang zingah anmahni lo mikhualtute hnena sumfaia lawmthu sawi pawh an awm tih thu dawn a ni.
Pathianni bikah khan lei hi a min leh avangin lirthei a tlang thei lo reng a, khaw thim hmaa tih tlang niin, lirthei thenkhat chhuah leh an ni a, thim hnu ah erawh kawng hi khar a ni.