Khua a tha a, kawng pawh a zia deuh

Mizoram nghawngtu Kawnpui leh Khamrang inkar kawng chhiaah lirthei an tlan pangngai rih a, khua a that avangin Inrinni leh Chawlhni khan lirthei tang nasa leh traffic jam nasa a awm lo tih thu dawn a ni.
Thla hmasa atang khan he kawng chhia hian kawng hrang hrangin Mizoram a nghawng a, tun hnaiah a theih ang anga siam a ni.
Kawng siam a nih avang hian lirthei enkawltu pawlte leh Mizoram sorkar remruatnain, chak zawka hna thawh a nih theih nan August ni 2 atangin he kawngah hian lirthei an tlan lo a, Kawnpui thlang lamah leh Khamrang chhak lamah lirthei engemaw zat an ding. August ni 7 zanah sorkarin lirthei dingte a tlantir tan.
Mizoram Truck Drivers Association (MTDA) hruaitute chuan lirthei an tlan leh hian rei lo teah kawng hi a chhe leh a, lirthei tangte pawh a awm leh nghal tih an sawi a, mahse Inrinni leh Chawlhni-ah khua a tha a, lirthei tang leh traffic jam vak vak a awm lo a, tluang takin an tlan tih an sawi.
Chutih rual chuan, kawng hi a that tak tak loh avangin lirthei an thang rei tih an sawi a, Kawnpui atanga chhuakte’n hun an hmang rei a, zan dar 8-a chhuak, zanlai dar 2 vela Aizawl thleng thei chauh te an awm tih an sawi.
“Kawng an siam khan lung an vawm khawm a, chu chu rei vak lovah lirtheiin a chil chhe leh a, lung chil keh a awm a, lirtheiin a rah avanga pawk chhuak a awm bawk a. Inrinni khan khua a tha a, kawng a khu mah mah hial a, chutiang hnuaiah chuan kawng hi a chhe leh tho a. A hma ai chuan a zia teh meuh a, mahse a tlan chak theih loh,” MTDA hruaitu pakhat chuan a ti.
“Truck a tlu ta lo ringawt pawh hi lawmna tham a tling a, rei deuh deuh kan tang ta lo hi a lawmawm em em a. Chu chu hmasawnna a ni,” a ti a, lui kawr hai fai loh vanga kawngpuia tui tluang, chuvanga diak nal lai chu khaw that lai pawhin a awm tho tih a sawi bawk.
Kawng siam hna thawktute’n lung inchhawpin excavator (JCB) nen an vil a, a chhe lai apiang hnawh nghal zel an tum tih thu dawn a ni.
MTDA hruaitute chuan lirthei din chhungin Vairengte leh Lailapur inkarah truck 300 vel an ding hman tih an sawi a, August ni 9 zan atangin anni hi an tlan tan a, Mizoram chhunga lo tangte nen, lirthei tlan a tam a, chuti chunga a hma anga an tang ta lo chu lawmawm an tih thu an sawi. Chutih rual chuan ruah a sur rualin kawng hi chhe leh mai tura rin a nih thu an sawi tel.
Aizawlah bungrua a lut a, mahse kawngah an thang rei avangin bungrua hi a thleng zut zut rih lo tih an sawi bawk.