Larsap-in Serchhip a tlawh
Larsap-in Serchhip a tlawh
Larsap Gen. Vijay Kumar Singh (Retd) chuan langin Thawhtanni khan Serchhip district a tlawh.
Mizorama school tha tak tak – Eklavya Model Residencial School, Kendriya Vidyalaya, Sainik School leh Jawahar Navodaya Vidyalay-te banphaka sawrkar laipuiin a chhawp chu chhawr tangkai turin mipui a chah a. Sawrkar laipuiin mipui dawmkanna atana scheme tha tak tak a siam tih sawiin, a bikin official-ten tribal tana duan special scheme ho zirchianga a mamawhtu dik takten an chhawr tangkai theihnana tan la turin a chah bawk.
Ruihhlo hluar zelin pawikhawihna a ti punlun tih larsap hian a sawi a. A do let kawngah khawtlang tanrual a tul, tiin, kan thalai, nakin lawka ram inghahna turte ruihhlo ata chhanchhuak turin theihtawp chhuah tlan a tul tih a sawi.
Serchhip district bawrhsap Paul L Khuma’m an district chanchin leh hmalakna a sawi a. Thuneitute hnena mipuiin awlsam taka complaint an thehluhna tur – Vantlang Viltu application siam a ni a, hnathawh tawh dan, fund dawn dan leh neih zat awlsam taka en theih turin MLA fund digitise a nih bakah Jal Jeevan Mission 100% zawhfel a ni. Bana Kaih Policy kaltlangin sawhthing quintal 8845.28 lei a ni a, a chingtute bank account ah Rs 4,20,64,748 thun a nih tawh.
Serchhip SP Gavit Gogna sawi danin, kumin July thleng khan pawikhawihna thleng zingah mi in rawk (41%) a tam ber a, rukruk (22%) leh case dang 37% a awm. Urea bag 300 an man a. Myanmar raltlan 647 leh Bangladesh 266 an nei mek a, Myanmar raltlan 132 biometric enrollment zawhfel a ni tawh.
Larsap hian tlawmngai pawl aiawh, kohhran hruaitute leh Ex-Servicemen a kawm a. 14 Assam Rifles Hqrs, Shalom Special School leh Sainik School Chhingchhip a tlawh bawk.