Women’s Polytechnic-in zirlai lut tharte lawmlut

Women’s Polytechnic-in
zirlai lut tharte lawmlut
Women’s Polytechnic Aizawl chuan Thawhtanni khan zirlai lut tharte an neihte an lawmlut a. Hmanpuitu minister Lalrinpuii chuan, Women’s Polytechnic atanga zirchhuakten eizawnna mumal (placement) an nei zel chu lawmawm a ti a, an zirna a that zia a tilang tih sawiin, tunlai thiamna leh mamawh mila course kalpui zel turin a chah.
Women’s Polytechnic-ah hian three year diploma course pali – modern office practice (MOP), electronic & telecommunication engineering (ET), garment technology (GT) leh beauty culture & cosmetology (BCC) a zir theih a. MOP zir tur hian pawl 12 pass a ngai a, course dang pathum ET, GT leh BCC hi pawl 10 pass tan a zir theih.
An zirchhuah hnua hna lo zawn saktu tur Training & Placement Cell awmin zirlai zirchhuak tawhte hnathawh tur ngaihtuah sakin, Mizoram pawna company-te nen campus interview an neihpui thin. Women’s Polytechnic atanga zir chhuak engemawzat chu India ram hmun hrang hrang leh foreign thlenga hna thawk an awm a, mahni kea dinga sumdawng engemawzat an awm bawk.