Mallorca muala harsatna tawk lo Barcelona

Mallorca muala harsatna tawk lo Barcelona
Estadi Mallorca Son Moix chhunga inkhel entu mipui 23,318 hmaah Catalan team chuan 3-0 laia RCD Mallorca hneh chungin Spanish La Liga season thar bul an tan.
Barcelona tana a competitive debut-ah Marcus Rashford chuan goal khung zo lo mah se hnehna nuamsa nen a club thar a chakpui a, kum 1989 hnu lama Nou Camp club tana English player khel hmasa ber a ni.
He inkhelah hian tan atanga minute sarihna lekah Raphinha chuan Lamine Yamal-a right-wing cross atangin mikhual goal hmahruai a khung a; minute 23-ah Ferran Torres chuan Barca goal hnihna a thawh ve leh.
Mallorca captain Antonio Raillo chu Yamal-a shot a danna lamah box chhungah a tlu a, a lu a hai deuh tih a hmuh theih.
Mualneitu team buaina belhchhah turin minute 33-na lekah Manu Morlanes chu Yamal lakah a foul leh a, yellow card vawi hnih hmuh tlin vangin hnawhchhuah a ni.
Mallorca tan buaina dang a rawn inlar leh a, minute 39-ah debutant Barcelona goalkeeper Joan Garcia laka a boot a khai san hlauhawm fiai fiai lutuk avangin Vedat Muriqi chu hnawhchhuah a ni ve leh.
A tirah Muriqi hremna hi yellow card a ni zet a, video assistant referee (VAR) review hnuah red card-a thlak a ni ta zawk a ni.
An inzat laia mualneitu team laka goal hnih thun thei Barcelona hian player pahniha an tam zawk hnuah goal khat an khung belh thei hram a, chu chu hun pekbelh minute lina a kal mek laia Lamine Yamal tihluh a ni.
Tarlan tawh angin, second half tir lam minute 69-a khelmual lut Rashford kha Gary Lineker hnu lama Barcelona first team tana English player khel leh hmasaber niin, kum 27 mi hi tun season chhung atan loan-in Barca tan a khel dawn a ni.
Barcelona hian tunkar Inrinni zan hian Levante an luhkhung leh ang a, Mallorca-in home bawk chang lehin Celta Vigo an mikhual ang.