75th Junior National Basketball Championship Mizoram team inbuatsaih chho zel

75th Junior National Basketball Championship
Mizoram team inbuatsaih chho zel
Ludhiana, Punjab-ah September ni 2 atanga ni 9 thleng neih tur 75th Junior National Basketball Championship-a inlan turte chu head coach KC Lalliantluanga leh assistant coach/manager Richard Lalropuiate kaihhruaina hnuaiah uluk takin Hawla Indoor Stadium, Republic Vengah practice neih thin a ni a, tlai lamah zirna tibahlah lo zawngin inbuatsaihna hi kalpui a ni.
Inter school tournament nen a innan avangin duhthusam practice hun erawh he team hian nei tawk lovin khaihlak chang a awm thung.
July ni 26 khan he inelnaa kal turte trial hmangin thlitfim an ni a, July ni 28 atangin inpuahchahna nei nghalin, he chanchin buatsaih lai thleng hian tum 20 zet practice an nei tawh. Club tha MSL leh D League-te nen a khat tawkin match an khelh thin chu team tan a tangkai hle.
Mizoram team-te hian August ni 29-ah Lengpui airport atangin Guwahati an pan ang a, ni 30 ah train-in Guwahati atangin Ludhiana an pan leh ang.
An rawn let hun tura ruahman chu September ni10-ah Ludhiana to Guwahati, September 13-ah Guwahati to Lengpui airport niin, inter school hmawrbawkna lam nang hmanin player-te an rawn let hman ang.
Mizoram tana fehchhuak turte:

1. Lalrinchhana – Kulikawn
2. Christian Lalhmachhuana Sailo – Kanan
3. Emanuel Lalpekhlua – Republic
4. C. Lalfakzuala – ITI
5. Joel Lalbiakhlua – Khatla South
6. Lalfakpuia – Tuikual South
7. Samuel Vanlalpeka – Kulikawn
8. Christopher Lalfakawma – Champhai
9. Roney Vanlalawmpuia – Bungkawn
10. Jacob C Vanlalruatdika – Khatla south
11. RL Rinchhana – Tuikual North
12. PC Lalawmawma – Salem

Coach – KC Lalliantluanga (KC Maliana)
Manager/Asst. Coach – Richard Lalropuia