Mizoramah BSNL tower phun belh leh online centre sawidun
Bharat Sanchar Nigam Ltd NE-1 Telecom Circle chief general manager Daily Giri chuan Thawhlehni khan chief minister Lalduhoma a kawm a. Mizoram tan mobile phone tower tam zawk leh online exam centre tam zawk awm theihna tur leh India ram khawpui thenkhata Mizoram House sak dan tur a sawipui.
BSNL hotu hi kumin July 10-a chief minister leh BSNL chairman & managing director A Robert J Ravi New Delhi-a an inkawmna bawhzuia lokal a ni a. Mizoram hmun kilkhawr zawka zirlai leh hna zawng laiten online exam an neih dawnin Aizawl leh district khawpui an pan thin a. He harsatna hi tihnep a nih theihnan tunhmaa BSNL Exchange ni thinte Online Exam cum Skill Training Centre-a lehlin an remti.
Mizoram hmun kilkhawr zawkten internet signal tha an neih ve theihnan tower engemawzat phun belh nise an ti bawk a. Tunah BSNL hian Mizoram tan tower 53 phun belh tur a nei sa a. A phunna tur hmun hi sawrkar ngaihpawimawh hmasak hmuna phun phawt tum niin, a tul angin tower hi dil belh zel theih a ni.
India ram khawpui danga BSNL rama Mizoram House emaw hostel, neitu nihna intawm (partnership pattern) hmanga din an sawi a. A kalpui dan tur hi GAD-in lo duang se, BSNL nena inbe rawn zel chunga kalpui a ni ang.
Mizoram rel kawng leh rel station thar tan mobile signal tha chhawpsak pawh an sawi a. Daily Giri hian hma an lak mek thu chief minister hi a hrilh.