THAI – BAWIH = NUPUI – BAWIH ( Pa Kan Tlawm : Nu an Bâng bik lo!)

F. Lalremsiama
Chaltlang
8415994340

Ziaktu tarlan hi kan insawi chiang (identify) kual hlek teh ang. Fiamthu hauh loin. “Thaibawih Thler” an tih thin, tunlai chuan, Bethel Thler an tih tak zawka mahni in luma awm ve ka nia. Hming hmasa put chhan khi, Pu C. Thangzika, Chaltlang Lal, Pu Thangphunga fapa a ni. Mizo zinga Ziak leh Chhiar thiam hmasa berte, Pu Buanga leh Sap Upa te Thingpui Huan tlanga awm chilhtu hmasa ber nia sawi, Pu Thangphunga fapa, Bawrhsap Office a thawk thin – khan nupui fel tak Pi Thawmi, Bukpui Lal Khawkunga fanu a nei a. Heti lam Laipui – tlang panna pengthuam-ah Pu Zakhuma, Pi Buangi pasal kha anmahni in neiin an awm bawk a. Helai kawngpui, Bawngpukawn, kawngpui âna in neia awm zawng zawngte hi “Thai-bawih kawtthler (Street)” a awmte chu kan ni. Pu Thangzika leh Pu Zakhuma te chauh hi an Thaibawih fâl bik lo chiang viau. Association awm ta se, OB-a awm tur kan indaih viau ang!
Mizo hnam hrang hrangin Lal kan nei deuh vek. Tu mah Lal chi (Hnam) an awm bik lo tiin ka lo ziak ve tawh. Pawih ho te hi. Min chhawr ber sia min sawichhe leh ber si. Sailo Lal te kha ka ti leh duh pek. Chuti e-tilo chuan ka fak leh tlat fo. An Thaibawih lo riau. |hianpa Lalthangfala Sailo (RIP) a Pu te rama inbengbel pawh a nupui, Sailo Lal fanu, Hrimi lakah a Thaibawih chuang lo thei tlat! He thu kher kherah hi chuan Sailo nupa-in Chawngthu Lal fa ve ve an khum ka ti.
Mizo Upa Thufingte hi lehkhabua ziaktu awm thei se ka va ti êm! Kan bosal thui ta lutuk. A pawi êm êm a ni.
Pakhat chiah. “NUPUI LEH LO CHU PAWMMAWI THEIH” Hemi awmzia hrethiam lo Patling nia inngai, lehkhathiam, milian, hausa hi kan ngah awm mang e! A neitua zir tihna mai a ni. Pakhat dang leh chauh: “Hmeichhe thu, thu ni suh, chakai sa, sa ni suh” I duhtawk rih mai ang.
Ni thei leh rih lo tlat. “Pa riltamin Hâk an zauh, Nu riltamin chawbel an len” Awi, ka rei aw! Nu kuta Pa-in Tangka kawltir? Aizawl-a kamding hmasate mawh! Pa ber ni tin Pisa-a kala Tangka neih zawng zawng ah (kenchhuah) ziah a rem lo, a dik lo. Nu ber a kawltir loh nâkah. Nu a nutling zo lo ta fo. I hria em? Chhut teh.
“Tunlai leh Changkanna”. |halai te khawvel, Nu leh Pa ten mawhphurhna leh Thuneihna bansanin (abdicating authority) “Ka Nun – It’s my Life” kan laltir. Kan tisual let dêr! Ka tawnhriatah ka chiang. Israel fate Mosia hoa Kanaan, Khawizu leh Hnutetui Luanna ram pante khan malsawm dawng lo, “Nau chhiatna ram an paltlang vel lai” kha kan ang ta hial. Chhut ve mah teh.
“SANTA BARBARA LEH THE BOLD AND THE BEAUTIFUL” te phiangsen vanga Mizo hmeichhe rilru chhe zo ta, kawppui pasal nei pasalte thlim thiam an pung. Ka thin a va ur er ur êm! A nghawng kalzel, vawiin thlengin, nupui – pasal inthenna leh fanau ti fahrah chiam chiam. Sex inpawlna zalen ta lutuk leh HIV/AIDS leh ruihtheih ngawl vei!! Aw, ka sawi thiam lo naa ka ngawi thei lo!!
“Kan damna tur chu” :
l Kalphung Thar Hremna na tak. Rangkachak thianghlim nan Mei a ngai angin, SASCI +?
l Ram leh Hnam Hmangaihtu tak tak (Patriot) chet chhuah tur. Mihrâng, sahrâng hmaa zâm lo, Hnam huaisen, Mizo kan ni. “Concentration Camp” kan din thliah thluah tur a ni. China leh Russia ten kum sawm tam liam tawh ah an lo hmang tangkai tawh. Israel Kibutz te pawh a kailawn atan ngaihtuah tel a tha ang. Chho zawng emaw chhuk zawng emaw atan.
l Psychologist – ten Hlauh tur awm hi Suala awm daltu tha tak an tihte hre reng ila.
l Pathian Ram thil a ni a, Kohhran hote hian Campaign, Crusade, Camping pawh thliar felna chhihri-ah hmang nghe nghe ila. Pathian Ram a lo thlen nan. Puritan hote ang tho khan thahnemngai zualte chuan |awngtai khawl (Prayer Chain) te dinin, a tak takin vawng nung se.
l DPR siam vat, Sasci tha tawntaw, Kum 50 Loan nen Beiseina thar i nei ang u.
Hmeichhia hian mipa hi chu Pâ atan an duh vek, mutpuia Pa atan chauh ni loin Huaisen tur pawhin. Hei hian “mipa tleirawl (teen-age) te, Thaibawih chhungkuaah a tibuai tlat”. Pa thu aia Nu thu final a ni thin hi an ngaithei lo. Pa a tlawm tlat. Chhungkuaa mipa fate an Matric, Graduate hleih-theih-lohna ah fanu te chu Graduate, Masters, Ph.D (Doctorate) zung zung theih dan en hian, chhuanthar Future an ti Bright lo zo, mipa kan tlem tulh tulh, hmeichhia an tam zawk tual tual. Hmeichhia ringawt fel leh thiamsân chuan Thaibawih lamtluang: matriarchal/matrilineal Meghalaya Khasi leh Garo unaute lam hawi (tendency) bâk a kawk lo! Ram leh Hnam hnuk a khawih pawi mek. Han phek chet, hnatlang (fire-fighting) dawn ila mi private life leh Human Rights râl (Hmelma) nih a awlsam bawk si.
Kan hmeichhiate dem ngam tur kan ni mawlh si lo! Hmanni lawk thlenga “Zonunmawi” chelhtu, naupan têt a, Tui um khirh rual, chhungkaw tuichawitu leh inchhung sekrek-ah nu nena hun hmang pumhlum an nih kha. Kan intih hmasawn hnu pawh hian in chhung thil tul tinrenga Nu ber Puitu an ni reng. Hman leh Tunah mipa naupang chu, daivak, aidu-tumbu khawrh leh sava veh, thangkam leh luite chakai khawrh vela vakchhuak reng – mipa nih ching kan ni. Tun changkanna Mizo Nunphung (Culture) ral an lo len meuh chuan chutiang vel chu a rem ta lo. Hei tak, mai hi, “Patling leh Nutling nih” kan chanvo leh mawhphurhna, kan “FAIL LOHNA TUR” chu! Rahbi hmasaber “Thaibawih nih loh”.