US Open women’s singles: Sabalenka leh Raducanu la vung chho zel

US Open women’s singles:
Sabalenka leh Raducanu la vung chho zel
Kum 2020 hnu lama US Open semi-final chin tal la thleng zat zat Aryna Sabalenka chuan kumin pawh hian last four a hnaih chho leh mek a, Nilaini zan khan Flushing Meadows, New York-a a title kawl lai humhim tura a beih meknaah 7-6 (7-4) 6-2-a Polina Kudermetova hnehin third round a lut leh ta phawt.
Defending champion Sabalenka hian US Open second-round a paltlangna kawngah tie-break record a kawl mek chhunzawmin, a zawna a tum 17-na a hlenchhuak a; set hmasa zawka Russian nula tang khawng ve tlat khan san a pek ve hlek a ngai!
Kum 27 mi Sabalenka chuan inkhelh banah nawrtua tan a ngaih thu leh point tin hmu tura theihtawp a chhuah thu a sawi.
Three-time Grand Slam champion hian kum 2014 champion Serena Williams hnu lama women’s singles title humhim leh thei hmasaber nih a tum mekna kawngah kum 2021 finalist Leylah Fernandez kha a tum leh dawn a, kha mi final-a Britain number one Emma Raducanu ngam loa tlawm Canadian mihang nula Fernandez pawh hi Belarusian tan pawh hnehsa khelha khelh nghal ngawt a rem lutuk lo mai thei!
Nilaini second round inkhel dangah Raducanu hian darkar khat lek chhungin Indonesian qualifier Janice Tjen chu 6-2, 6-1-in a paltlang mai a, he mi ni Louis Armstrong Stadium-a inkhel hmasaber hian a awh rei lem lo khawp mai!
Mak tak maia kum 2021 title a lak nawlh hnu khan Raducanu hian US Open match-ah hnehna a chang thei ta hlek lo chho kha a ni a, kumin chu a dan a dang leh ta mek a, second round-ah pawh unforced error vawi riat chiah neiin a chak.
A khelhpui kha player tha leh hlauhawm tak a nih thu sawi chungin hnehna a chanah a hlim takzet tih a sawi.
A chipui Jack Draper chu Nilaini khan hliam avangin a inhnukdawk a, US Open kal laiah kum 22 mi Raducanu chiah hi Briton dam awmchhun ni tawhin, ninth seed Elena Rybakina of Kazakhstan nen third round lamah an intum leh dawn a ni.
World number 36 Raducanu hi thla hmasa Wimbledon hnu lamah khan a rawn kang zual zel a, London major tournament hnua match 11 a khelh tawhah vawi riat chakin, North American hard court lama a chetthatna hian kum 2021 ropuina ang kha a thlen zo leh dawn em kan thlir kal mek a ni!
Tjen hian a opening round-ah 24th seed Veronika Kudermetova a lo hneh ve tawh miau avangin Briton Raducanu tan pawh entry-level ITF World Tennis Tour-a title 13 la tling ve tawh Asian nula kum 23 mi hi tawngpawng zuam nghal ngawt chu a ni lo ang a, mahse, United States university atanga sociology degree a lak hnua nikum maia professional tennis luhchilh tan Indonesian qualifier tan British number one barakhaih chu a la harsa deuh rih a ni!
Tjen-i style kha world number one hlui Ashleigh Barty khelh dan nen an khaikhin a, mahse, Raducanu hian Asian nula tan hlawh tak danchah dan chu a lo hre nangiang mai a, coach thar Francisco Roig hnuaia a serve-in hma a lo sawn tawh bawk avangin ace pawh vawi riat ngawt a nei a; a first serve chu 79% laiin a dik a, chu tan tanga a point hmuh pawh 76% a kai pha hial a, Tjen tan chu ngawt pawh chu chai tham a tling lo thei lo a ni.
A hmachhawn leh tur Kazakh star Rybakina chuan second-round match dangah 6-3 7-6 (9-7)-in Czech world number 96 Tereza Valentova a hneh ve bawk.
American 10th seed Emma Navarro pawhin a chipui wild card Caty McNally chu 6-2 6-1-in a sawp a; American fourth seed Jessica Pegula pawh 6-1 6-3-in Anna Blinkova lakah a chak a, three-time finalist Victoria Azarenka nen third round lamah an intawng leh ang.
Belarusian Azarenka hian Stadium 17-ah 6-3, 6-3-in Anastasia Pavlyuchenkova a hneh a, professional era bikah hmeichhe player zinga hardcourt major singles main draw-a match 100 chak tling pangana a ni.
Nikum US Open runner-up Jessica Pegula pawh New York khawpuia third round lut langsar niin, American fourth seed hian world number 80 Anna Blinkova chu minute 65 lek chhungin Arthur Ashe Stadium-ah 6-1 6-3-in a hneh.
Kum 31-a upa Pegula hi nikum Flushing Meadows final-ah khan world number one Sabalenka ngam loin a tlawm a, kha mi hma zawng khan Grand Slam pali singles-ah quarter-final stage a la pel ngai lo.
Nikum US Open-a final a luh hnu khan a dinhmun a nghet lo hle a, chak leh chak loh a indawt zut a; kumina Grand Slam tournament pathum a khelh tawhah last eight lut zo loin a tla fai vek a, Wimbledon-ah phei chuan first round-ah a tla thum tawk!
US Open inbuatsaihna hard court tournament pathum – Washington, Montreal leh Cincinnati-ah pawh a tla hma leh vek a, Flushing Mewdows-ah hian nikuma a thlen chin a chuangkai pha lo mai ang tih hlauhthawnna a pian mek laiin second round thlengin harsatna lian a la tawk chiah lo.
Tarlan tak angin, Pegula tum leh tur Victoria Azarenka hi player tawnhriat ngah, veteran player a nih mai piahlamah US Open-a tum thum ngawt runner-up lo ni ve tawh a ni a, final-a la chak zo lo ve ve inbeihna a nih dawn avangin chak mamawh pahnih inhmachhawn tur hi result sawilawk harsa tak tur zinga mi a nih a rinawm.
Ninth seed Elena Rybakina chuan Czech qualifier Tereza Valentova lakah fiahna hmachhawnin 6-3 7-6 (9-7) hnehna a sualchhuak hram a, British number one Emma Raducanu a tum zui leh dawn a ni.
10th seed Emma Navarro pawhin American ve ve inbeihnaah Caty McNally chu 6-2 6-1-in a sawp a, third round match pakhatah 6-4 6-2-a Japanese Moyuka Uchijima vawtlatu Wimbledon champion hlui Czech Barbora Krejcikova a hmachhawn leh ang.